Казахстаны германчууд Зөвлөлтийн түүхийн өвийг мартахгүй байхыг хичээж байна
Судлаачдын хэлснээр Казахстанд ГУЛАГ-ын хар түүхийг судлах сонирхол бага хэвээр байна.
DW1 мин унших
DW
Астана хотод суралцдаг 22 настай Юнна Кинерейш өөрийгөө Казах герман гэж тодорхойлдог бөгөөд тус улсад амьдардаг 223,000 Казах германчуудын нэг юм гэж Дойче Велле мэдээлжээ.
Гитлерийн Герман 1941 онд Зөвлөлт Холбоот Улс руу довтолсны дараа Орос, Украинд амьдарч байсан олон зуун мянган германчуудыг Сталин Сибирь, Казахстан руу цөлсөн байна. Сая гаруй цөллөгчийн дор хаяж 200,000 нь өлсгөлөн, албадан хөдөлмөрийн улмаас амиа алджээ.
Кинерейш 2025 онд Астанагийн ойролцоох АЛЖИР хорих лагерьт хоригдож байсан герман эмэгтэйчүүдийн тухай кино бүтээсэн байна. Эх орноосоо урвагчдын эхнэрүүдэд зориулсан уг лагерьт 18,000 эмэгтэй хоригдсоны 167 нь герман эмэгтэй байжээ.
«Миний өвөг дээдэс Казахстан дахь ГУЛАГ-ын тогтолцоог даван туулсан. Тиймээс үндэс угсаагаа мартахгүй байх нь надад чухал» гэж Кинерейш хэлэв.
Хамгийн том Карлаг лагерийн цогцолбор Нью-Йорк хотоос 22 дахин том байсан бөгөөд 1931-1959 онд сая шахам хүн тэндүүр өнгөрчээ. Зөвхөн 1940-1950 онд 10,000 орчим хоригдол өлсгөлөн, хүйтэн, өвчин, албадан хөдөлмөрийн улмаас нас барсан гэж үздэг.
Астана дахь Назарбаевын их сургуулийн антропологич Кэтрин Эрдманы хэлснээр Казахстаны олон хүн, улс төрийн зарим хүрээ тус улсын хэрцгий түүхтэй нүүр тулах сонирхол багатай байна.
