Казахстаны хүүхдүүд эмнэлэгт хэвтсэний дараа Ташкентэд эрүүгийн хэрэг үүсгэжээ

Ташкентийн Чиланзар дүүргийн прокурорын газар Казахстанаас хөлбөмбөгийн тэмцээнд ирсэн хүүхдүүд, тэдний ойр дотны хүмүүс эмнэлэгт хэвтсэн явдлаар эрүүгийн хэрэг үүсгэжээ гэж Газета.уз сайт мэдээлэв.

Хэргийг Эрүүгийн хуулийн 276−13 дугаар зүйлийн ариун цэврийн хууль тогтоомж зөрчсөн заалтаар үүсгэсэн байна.

Карагандагийн залуу хөлбөмбөгчид, насанд хүрсэн төлөөлөгчид олон улсын хөлбөмбөгийн наадамд оролцохоор Ташкентэд ирсэн юм.

Эрүүл мэндийн яамны мэдээлснээр, 11 дүгээр сарын 1-нд тэд нэгэн зочид буудалд өглөөний цайндаа дутуу шарсан өндөг, хиам идсэн байна. Мөн өдөр 13 хүн бөөлжиж, суулгаж, хэвлийгээр өвдөж, халуурчээ.

11 дүгээр сарын 2−3-нд өөр долоон хүн ижил шинж тэмдгээр эмнэлэгт хүргэгдэж, нийт 20 хүн хэвтсэн байна. Тэдэнд хурц суулгалт гэсэн урьдчилсан онош тавьжээ.

Хоёр өвчтөн эмнэлгээс гарсан бөгөөд сэхээн амьдруулах тасагт хүн байхгүй аж.

Хоолны дээжийн лабораторийн шинжилгээ үргэлжилж байгаа бөгөөд дүнг нь дараа мэдэгдэхээр амласан байна.