Казахстаны Solidcore компани Тажикистанд үнэт металлын хайгуул хийхээр гэрээ байгууллаа

Казахстанд төвтэй алт олборлогч Solidcore Resources компани Тажикистаны Геологийн ерөнхий газартай тус улсад үнэт металл, олон металлын хүдрийн хайгуул хийх гэрээ байгуулжээ. Казахстан, Тажикистаны ерөнхийлөгчид Астанад хэлэлцээ хийсний дараа хоёр тал арваннэгдүгээр сарын 7-нд санамж бичигт гарын үсэг зурсан байна.

Solidcore-ийн гүйцэтгэх захирал Виталий Несисийн хэлснээр, шинээр байгуулсан Solidcore Tajikistan охин компани орон нутгийн эрх баригчид, түншүүдтэй хамтран боломжит төслүүдийг тодорхойлно. Төслүүд батлагдсаны дараа хэрэгжүүлэх, санхүүжүүлэх асуудлаар тусад нь тохиролцоно.

Олон улсын валютын сангийн мэдээллээр, Тажикистаны алт олборлолт 2024 онд 14.5 тоннд хүрч, 2015 оныхоос дөрөв гаруй дахин өсчээ.

Тус салбарт Хятадын компаниуд давамгайлж байна. Тус улсын хамгийн том алт олборлогч Зеравшан компанийн 70 хувийг Хятадын Zijin Mining, үлдсэн 30 хувийг Тажикистаны засгийн газар эзэмшдэг. Тус компанийн уурхай улсын алтны олборлолтын 70 орчим хувийг бүрдүүлдэг.

Европын сэргээн босголт, хөгжлийн банкны (ЕСБХБ) мэдээллээр Тажикистанд 50 орчим төрлийн ашигт малтмалын 600 гаруй орд бүртгэгдсэн ч засаглал, зохицуулалтын саад бэрхшээлээс болж хувийн хөрөнгө оруулалт хязгаарлагдмал байна.

Өмнө нь Polymetal International нэртэй байсан Solidcore компани барууны хориг арга хэмжээ авсны дараа 2024 онд Орос дахь үйл ажиллагаагаа зарж, Казахстанд төвлөрсөн юм. Компанийг Оросын бизнесмэн Александр Несис үүсгэн байгуулсан бөгөөд түүний дүү Виталий удирдсаар байна.

Одоо компанийн хамгийн том хувьцаа эзэмшигч нь төрийн өмчит сан тэргүүтэй Оманы хөрөнгө оруулагчдын консорциум бөгөөд аравдугаар сарын байдлаар санал өгөх эрхийн 41.35 хувийг эзэмшиж байжээ.

Есдүгээр сард Solidcore Japan Gold компанитай Хоккайдо, Кюүшү арлуудын таван талбайд гурван жилийн алтны хайгуулын хөтөлбөрийг санхүүжүүлэхээр тохиролцжээ. Хөтөлбөрийн төсөв 25 сая ам.доллар.

2025 онд Solidcore алтны эквивалентаар 395 мянган унц үйлдвэрлэж, 412 мянган унц борлуулсан нь 2024 оныхоос тус тус 19, 23 хувиар бага байна. Гэвч алтны үнэ өссөнөөр орлого 13 хувиар нэмэгдэж, 1.5 тэрбум ам.долларт хүрчээ.