Харьковт хүний амь эрсдүүлсэн цохилтын үеэр Украины Старлинк холболт тасарсан байжээ

Украины зүүн хэсгийн Харьков мужийн 34 настай нүүр будагч Юлия Спичак 10 дугаар сарын 19-нд хүүгээ англи хэлний хичээлд хүргэж өгөөд ойролцоох цэцэрлэгт хүрээлэнд суун эгч Алинадаа селфи илгээх гэж байжээ. Хэдхэн секундийн дараа Оросын дрон цэцэрлэгт хүрээлэн рүү унаж, Спичак болон 1 настай охин зэрэг дөрвөн хүнийг хөнөөсөн байна. Энэ тухай Си Би Эс Ньюс телевиз мэдээлэв.

Энэ халдлага Илон Маскийн Спэйс Экс компани Украины Старлинк хандалтыг хязгаарласнаас зургаан хоногийн дараа болсон юм. Украин Старлинкийг Оросын халдлагаас хамгаалахад болон зарим довтолгооны ажиллагаандаа ашигладаг байв. Маск Икс сүлжээнд Украиныг Орос руу довтлоход ашигласнаар Старлинкийн үйлчилгээний нөхцөлийг зөрчсөн гэж буруутгажээ.

Украины албан тушаалтнууд урьдчилан мэдэгдэлгүй тогтоосон хязгаарлалт газрын агаарын довтолгооноос хамгаалах радар, дрон саатуулагчдад нөлөөлж, Оросын цохилтыг зогсоох цэргийн чадавхийг сулруулсныг Си Би Эс Ньюс-д хэлжээ. «Энэ бол агаарын довтолгооноос хамгаалах дэд бүтцийн зайлшгүй хэсэг. Бусад бүх хамгаалалт ажиллахаа больсон гэж би хэлэхгүй. Гэхдээ энэ хэсэг Украины энгийн иргэдийг хамгаалахад нэлээд чухал» гэж Үндэсний аюулгүй байдал, батлан хамгаалах, тагнуулын хорооны гишүүн Вадим Ивченко даваа гарагт хэлэв.

Си Би Эс Ньюс-ийн олж авсан зургууд Харьковын дроны халдлага болсон 10 дугаар сарын 19-нд Украины газрын агаарын довтолгооноос хамгаалах радаруудын Старлинк холболт секундэд нэг мегабайтын аравны нэг хүртэл унасныг харуулж байна. Нэрээ нууцлахыг хүссэн технологийн мэргэжилтний хэлснээр, энэ хурд вэб хуудас ачаалахад ч хүрэлцэхгүй, агаарын довтолгооноос хамгаалах радарыг ажиллуулах нь бүү хэл.

Бямба гарагт Украины албан тушаалтнууд Старлинкийн хандалт улс даяар сэргэсэнийг баталсан бөгөөд Маск Спэйс Экс холболтыг хязгаарласнаа хүлээн зөвшөөрөв. «Иргэний арилжааны үйлчилгээ болох Старлинкийг хүн хөнөөх довтолгооны дроны цохилтод ашиглахыг хэзээ ч зөвшөөрч байгаагүй, зөвшөөрөх ч ёсгүй» гэж Маск бичжээ. Украины албан тушаалтнууд мөн Спэйс Экс компанийн Старлинктэй ижил хиймэл дагуулын бүлэг дээр ажилладаг, Украины дроны ажиллагааны тулгуур болсон цэргийн Старшилд сүлжээний холболтын асуудлаар гомдол гаргасан ч Маск Старшилд дээрх аливаа өөрчлөлтийг АНУ-ын засгийн газар хянадаг гэжээ.

Спэйс Экс тайлбар өгөхөөс татгалзсан бол Цагаан ордон Ерөнхийлөгч Трамп Украин дахь Старлинкийн хязгаарлалтыг өөрөө тушаагаагүй гэж өнгөрсөн долоо хоногт сэтгүүлчдэд хэлсэн үгийг иш татжээ. Юлиягийн эгч Алина Спичак ням гарагт Си Би Эс Ньюс-ийн сэтгүүлчидтэй хамт эгч нь амиа алдсан цэцэрлэгт хүрээлэнд очжээ. Түүний хэлснээр, эгчийг нь хөнөөсөн Оросын Геран-4 тийрэлтэт дрон маш хурдан ирсэн тул хохирогчид дуулаагүй байна. Алина дэлхий нийт Украинд дайн болж байгааг мэдэх ёстой бөгөөд удахгүй дуусна гэдэгт найдаж буйгаа хэлжээ.