Хегсет АСЕАН-ы орнуудыг Бээжинг тэнцвэржүүлэх цэргийн хамтын ажиллагааны тогтолцоо бий болгохыг уриалжээ

АНУ-ын Батлан хамгаалахын сайд Пит Хегсет Филиппиний Себу хотод болж буй АСЕАН-ы орнуудын батлан хамгаалахын сайд нарын уулзалтад Бээжинг тэнцвэржүүлэх цэргийн хамтын ажиллагааны үндэс суурийг бий болгохыг уриалжээ. Энэ тухай Интерфакс агентлаг Пентагоны мэдээллийг иш татан мэдээлэв.

Хегсет уулзалтад үг хэлэхдээ Вашингтон Бээжингийн нөлөөг эсэргүүцэхийн тулд Зүүн өмнөд Ази дахь түншүүдээ бэхжүүлэхийг зорьж байгааг онцолжээ.

Ирэх жил тэмдэглэх АНУ, АСЕАН-ы харилцааны 50 жилийн ойн өмнө Хегсет «ойрын хэдэн жилд бидний харилцааг чиглүүлэх практик механизм» боловсруулахыг санал болгосон байна. Тэрбээр «эдгээр нь шийдвэрлэх ач холбогдолтой жилүүд байх болно» гэж онцолжээ.

Хегсет Зүүн өмнөд Азийн хэд хэдэн орны батлан хамгаалахын сайд нартай хоёр талын яриа хэлэлцээ хийсэн бөгөөд Пентагоны мэдээлснээр эдгээр хэлэлцээ бүс нутагт саатуулан зогсоох чадавхыг бэхжүүлж, ачааг хуваалцах практикийг өргөжүүлэх зорилготой байжээ.

Хэлэлцээний үеэр холбооны удирдлага, хяналтын тогтолцоог шинэчлэх хөтөлбөр эхлүүлэхээр тохиролцсон бөгөөд АНУ-ын засгийн газар Филиппиний зэвсэгт хүчинд олгох санхүүжилтээ нэмэгдүүлэхээ амласан байна. Пентагоны тэргүүн мөн Япон, Австрали, Энэтхэгийн хамт олонтойгоо хамтын ажиллагааг гүнзгийрүүлэх асуудлыг хэлэлцжээ.