Хиймэл оюун ухааны эрэлтээр Өмнөд Солонгосын технологийн экспорт аравдугаар сард түүхэн дээд хурдаар өсчээ

Дэлхий даяар хиймэл оюун ухааны эрэлт өссөний нөлөөгөөр Өмнөд Солонгосын мэдээлэл, харилцаа холбооны технологийн (МХХТ) бүтээгдэхүүний экспорт аравдугаар сард өмнөх оны мөн үеэс түүхэнд байгаагүй хурдтай өсчээ. Энэ тухай мэдээллийг арваннэгдүгээр сарын 15-нд нийтэлсэн байна.

Шинжлэх ухаан, МХХТ-ийн яамны нэгтгэсэн мэдээллээр МХХТ-ийн бүтээгдэхүүний экспорт аравдугаар сард 70.35 тэрбум ам.долларт хүрсэн нь өмнөх оны 23.29 тэрбум ам.доллараас гурав гаруй дахин өссөн байна. Сарын экспортын хэмжээгээр энэ нь есдүгээр сард тогтоосон 75.1 тэрбум ам.долларын дээд амжилтын дараа хоёрдугаарт орж байна.

МХХТ-ийн экспорт тус улсын нийт 115.28 тэрбум ам.долларын экспортын 61 хувийг эзэлжээ. Энэ үзүүлэлт гурван сар дараалан 60 хувиас давж байна.

Хагас дамжуулагчийн экспорт өмнөх оны мөн үеэс 259.4 хувиар өсөж, 56.47 тэрбум ам.долларт хүрчээ. Өндөр зэрэглэлийн санах ойн бүтээгдэхүүний дэлхийн эрэлт хүчтэй, санах ойн үнэ өндөр хэвээр байгаа нь үүнд нөлөөлсөн байна.

Серверт зориулсан их багтаамжтай хатуу төлөвт хөтчийн ачаар компьютер, дагалдах хэрэгслийн экспорт тав гаруй дахин өсөж, 5.99 тэрбум ам.долларт хүрчээ. Дээд зэрэглэлийн загваруудын борлуулалт сайн байсны ачаар гар утасны экспорт 6.5 хувиар өсөж, 1.71 тэрбум ам.доллар болсон байна.

Улсаар нь авч үзвэл, хагас дамжуулагч, компьютерийн экспорт өссөнөөр Хятад руу гаргасан экспорт гурав гаруй дахин өсөж, 27.2 тэрбум ам.долларт хүрсэн бол АНУ руу гаргасан экспорт зургаа гаруй дахин нэмэгдэж, 15.56 тэрбум ам.доллар болжээ.