Хойд Солонгос тактикийн баллистик пуужинд суурилуулах кассет бөмбөг туршжээ

Хойд Солонгос тактикийн баллистик пуужинд суурилуулах боломжтой кассет бөмбөгийг туршсаныг тус улсын төрийн хэвлэл Ням гарагт мэдээлжээ. Энэ тухай Ёнхап агентлаг мэдээлэв.

Солонгосын төв телеграф агентлагийн мэдээлснээр, Пуужингийн газар Бямба гарагт тактикийн баллистик пуужинд суурилуулах кассет бөмбөгийн цэнэгт хошууны байлдааны чадвар, хүчийг үнэлэх туршилт хийжээ. Туршилтыг эрх баригч Ажилчдын намын Төв цэргийн комиссын гишүүн, генерал Ким Жон Сик удирдсан байна.

Кассет бөмбөг олон арваас хэдэн зуун жижиг бөмбөг тарааж, өргөн талбайд олон байг зэрэг онох боломжтой. Агентлагийн мэдээлснээр, Пуужингийн газрын судалгааны хүрээлэнгүүд Стандарт 2 төрлийн кассет цэнэгт хошуу хамгийн өндөр нягтралтайдаа 12-13 гектар талбайг үнс нурам болгох чадвартайг баталжээ.

«Энэ жилдээ бид ангиудад бүх төрлийг байлдааны зорилго, байны онцлогт тохируулан сонгож ашиглах боломж олгоно» гэж Пуужингийн газрын ерөнхий захирал хэлсэн байна. Түүний хэлснээр, кассет цэнэгт хошууг зориулалтаар нь дөрвөн ангилалд хуваадаг.

Хойд Солонгос 4 дүгээр сард удирдагч Ким Чен Ын, охин Жу Э нарын хяналтан дор Хвасон-11 Ра тактикийн баллистик пуужинд суурилуулсан кассет бөмбөг туршсанаа мэдэгдэж байсан юм.