Өмнөд Солонгосын аравдугаар сарын экспорт чипийн борлуулалтын ачаар дээд амжилт тогтоожээ

Өмнөд Солонгосын экспорт аравдугаар сард өмнөх оны мөн үеэс 93.7 хувиар өсөж, 115.3 тэрбум ам.доллар болж дээд амжилт тогтоосон нь хагас дамжуулагчийн нийлүүлэлт огцом нэмэгдсэнтэй голлон холбоотой гэж Ёнхап агентлаг мэдээлэв.

Худалдаа, аж үйлдвэр, нөөцийн яамны мэдээлэлд дурдсанаар хагас дамжуулагчийн дэлхийн эрэлт өндөр байгаа, томоохон технологийн компаниуд хиймэл оюуны дэд бүтцэд хөрөнгө оруулсаар байгаа нь нийт экспортыг өсгөжээ.

Импорт өмнөх оны мөн үеэс 36 хувиар өсөж, 72.78 тэрбум ам.доллар болсноор худалдааны ашиг 42.5 тэрбум ам.долларт хүрчээ.

Салбараар авч үзвэл Азийн дөрөв дэх том эдийн засгийн гол тулгуур болох хагас дамжуулагчийн экспорт 259 хувиар өсөж, 56.4 тэрбум ам.доллар болов.

Нефтийн бүтээгдэхүүний экспорт 80 хувиар өсөж 6.92 тэрбум, нефть химийн бүтээгдэхүүнийх 27.5 хувиар нэмэгдэж 4 тэрбум ам.долларт хүрчээ.

Хятад, АНУ, Европын холбоонд эрэлт нэмэгдсэнээр гоо сайхны бүтээгдэхүүний экспорт 57.5 хувиар өсөж, 1.44 тэрбум ам.доллар болжээ. Хайбрид бензин хөдөлгүүртэй загваруудын гадаад эрэлт нэмэгдсэний ачаар автомашины экспорт 18.1 хувиар өсөж, 6.55 тэрбум ам.долларт хүрэв.

Чиглэлээр нь авч үзвэл Хятад руу хийсэн экспорт хагас дамжуулагч, утасгүй холбооны тоног төхөөрөмжийн нийлүүлэлтийн ачаар 133.6 хувиар өсөж, 26.98 тэрбум ам.доллар болов. Хятад руу хийсэн экспорт тав дахь сар дараалан 20 тэрбум ам.доллараас давжээ.

Хиймэл оюуны дэд бүтцэд ашиглах хагас дамжуулагч, компьютер, цахилгаан тоног төхөөрөмжийн эрэлт өндөр байсны ачаар АНУ руу хийсэн экспорт 185.8 хувиар өсөж, 24.9 тэрбум ам.долларт хүрчээ.