Хонконгийн Тунг Чунг дахь баригдаж буй метроны буудлаас стандартын бус 30 орчим багана илэрчээ

Хонконгийн Барилгын газар бямба гарагт Тунг Чунг Вестэд баригдаж буй метроны буудлаас стандартын шаардлага хангаагүй хэдэн арван багана илрүүлснээ мэдэгдснийг Эр Ти Эйч Кей радио мэдээлжээ.

Төслийн бүртгэлтэй бүтцийн инженерүүд ийм 30 орчим багана тогтоосон бөгөөд газар тэднээс энэ сарын дунд гэхэд шалгалтын тайлан, засварын арга хэмжээний санал ирүүлэхийг шаардсан байна.

Газрын мэдээлснээр, асуудлыг өнгөрсөн сарын 27-нд хийсэн ээлжит үзлэг, чанарын аудитын үеэр илрүүлжээ. Хоёр бетон багана стандартын бус болохыг баталмагц инженерүүд болон гүйцэтгэгчид иж бүрэн шалгалт хийж, засварыг аль болох хурдан хийхийг даалгасан.

МТР корпораци холбогдох барилгын ажлыг түр зогсоосон юм.

Бетоныг үе шаттай авах явцад инженерүүдийн хяналтын баг нэмэлт баганаас ижил гэмтэл илрүүлж, өнгөрсөн мягмар гарагт газарт мэдэгджээ.

Шалны хавтангийн түр тулгуурыг хараахан аваагүй тул илэрсэн гэмтэл буудлын бүтцийн бат бөх байдалд аюул учруулахгүй гэж газар онцолсон байна.

Газрын урьдчилсан шалгалтаар батлагдсан зураг төслөөс санаатайгаар зөрсөн, эсвэл хариуцсан ажилтнуудын дараагийн арга хэмжээ дүрэм журам зөрчсөн нотолгоо илрээгүй байна.