Хятад Бохайн тэнгист хэт гүний байгалийн хийн хайгуулд томоохон амжилт гаргажээ

CNOOC Бохайн тэнгист далайн ёроолоос 5000 гаруй метрийн гүнд өрөмдсөн цооногоор галт уулын чулуулгийн давхаргаас өндөр гарцтай газрын тос, хий илрүүлж, хэт гүний байгалийн хийн хайгуулд томоохон амжилт гаргаснаа Пүрэв гарагт мэдэгдлээ. CNOOC бол Хятадын Үндэсний далайн газрын тосны корпораци юм.

Цооног Бохайн тэнгисийн төв хэсэгт, тэнгисийн нүүрсустөрөгчөөр хамгийн баялаг Божун хонхорын хажууд байрлана. Уг цооног хий агуулсан галт уулын чулуулгийн 120 гаруй метр зузаан давхаргыг нэвтэлж, нийт 5770 метрийн гүнд хүрчээ.

Цооногоос өдөрт 800 мянга орчим шоо метр байгалийн хий гаргах боломжтойг туршилт харуулсан гэж CNOOC мэдээлэв. Энэ үр дүн далайн доорх хэт гүний галт уулын давхаргад хайгуул хийх боломжтойг илтгэж байна гэж компани онцолжээ.

Бохайн тэнгисийн хэт гүний давхаргын геологийн нөхцөл нарийн төвөгтэй тул орд газрыг урьдчилан тодорхойлоход хэцүү гэж төслийн баг тайлбарлав.

Энэ бэрхшээлийг даван туулахын тулд CNOOC далайн гүний давхаргыг сейсмийн аргаар судлах технологи боловсруулжээ. Уг технологи олон эх үүсвэртэй, өргөн зурвасын, гурван хэмжээст сейсмийн өгөгдөл ашигладаг. Мөн хэт гүний далд толгод дахь чанар сайтай ордыг урьдчилан тодорхойлох аргаа сайжруулснаар Божун хонхорын галт уулын давхаргад байгалийн хий хуримтлагдахад таатай бүсийг тогтоох боломжтой болсон байна.

Энэхүү нээлт далайн хэт гүнд байгалийн хий хайх шинэ бүсийг илрүүлж, Бохайн тэнгисийн гүнд газрын тос, хий хайх боломжийг тэлсэн гэж CNOOC-ийн ахлах эрдэмтэн, ахлах геологич Сюй Чангуй хэлжээ.

Уг нээлт бүс нутагт хайгуулыг эрчимжүүлж, Бохайн тэнгист томоохон байгалийн хийн олборлолтын бааз хөгжүүлэхэд дэм болох төлөвтэй гэж CNOOC мэдээлжээ. Уг баазын нөөцийг 1 их наяд шоо метр гэж тооцож байна.