Хятадад бүтээсэн хоёр дахь том оврын аялалын хөлөг анхны туршилтын аяллаа дуусгажээ

Хятадад бүтээсэн хоёр дахь том оврын аялалын хөлөг Adora Flora City анхны туршилтын аяллаа дуусгаад пүрэв гарагт тус улсын өмнөд хэсгийн Гуанжоу хотод ирлээ.

Хөлөг арваннэгдүгээр сарын 22-нд анхны албан ёсны аяллаа хийхээр төлөвлөжээ. Уг хөлөг нь Хятадын дотооддоо бүтээсэн анхны том оврын аялалын хөлөг Adora Magic City-тэй ижил загвартай бөгөөд нийт 2130 бүхээг, люкс өрөөтэй, 5232 хүртэл зорчигч тээвэрлэх боломжтой.

Туршилтын аяллын үеэр хөлгийг ердийн аялалд байгаа мэт ажиллуулж, далайн аюулгүй байдал, хөлөг ба эргийн хоорондын уялдаа холбооноос эхлээд хөлөг дээрх систем, хоол, байр, зугаа цэнгэлийн үйлчилгээ хүртэл цуврал туршилт хийжээ.

Хөлөг бямба гарагаас даваа гараг хүртэл Гуанжоугаас Хонконг руу дахин туршилтын аялал хийж, бүс нутгийн чиглэлд ажиллах чадвар болон боомтын бүрдүүлэлтийн журмыг шалгана. Хөлгийг ажиллуулдаг Adora Cruises компани мөн үндсэн боомтынхоо ажиллагаа болон анхны аялалд бэлтгэх ажлаа үргэлжлүүлж байна.

Олимпын аварга, усанд шумбагч Гуо Жинжин хөлгийн анхны элчээр уригдсан бөгөөд Гуанжоугийн Наньша олон улсын аялалын хөлгийн үндсэн боомтоос анхны аялалд гарах ёслолын үеэр хөлөгт нэр хайрлах аж.

Adora Cruises-ийн мэдээлснээр, нийт тоннаж нь 141900 тонн бүхий уг хөлөг дотоод засал, ухаалаг технологи, хөлөг дээрх үйлчилгээгээрээ ихэр хөлгөөсөө илүү сайжирсан байна.

Гуанжоугийн залуучуудын танин мэдэхүйн аяллын хүрээнд Фудань, Жэжян, Нанжингийн их сургууль зэрэг Хятадын зүүн хэсгийн 16 их сургуулийн 1000 шахам багш, оюутан анхны туршилтын аялалд оролцжээ.