AliExpress: Ганц бие хүмүүсийн өдрийн хямдралын үеэр хөгжиж буй зах зээл дэх өдрийн дундаж гүйлгээ 50 гаруй хувиар өсөв

Ганц бие хүмүүсийн өдрийн хямдралын эхний долоон хоногт шинээр хөгжиж буй гадаад зах зээлүүд дэх өдрийн дундаж гүйлгээ өмнөх оны мөн үеэс 50 гаруй хувиар өссөнийг Alibaba-гийн AliExpress платформ арваннэгдүгээр сарын 11-нд мэдэгджээ.

Хятад бүтээгдэхүүний эрэлт өссөөр байгаа энэ үед гадаадын хэрэглэгчид Хятадын энэ хямдралд хил дамнасан цахим худалдааны платформоор улам олноор оролцож байна.

Өсөлт Өмнөд Америк, Европ, Африк, Зүүн өмнөд Азид ажиглагдсан бөгөөд Колумб, Перу, Швейцарь, Норвеги хамгийн идэвхтэй зах зээлүүдийн тоонд оржээ.

AliExpress энэ жил худалдаачдад хэлний бэрхшээл, тээвэр, үнийн ялгаанаас үүдэх хүндрэлийг даван туулахад нь туслах зорилгоор хиймэл оюун ухаанд суурилсан бизнес удирдлагын туслах хэрэгсэл нэвтрүүлсэн байна.

Уг хэрэгсэл бүтээгдэхүүний мэдээллийг автоматаар сайжруулж, тохирох тээврийн чиглэл сонгож, харилцагчдад үйлчилдэг.

Платформын мэдээлснээр, энэ үйлчилгээг ашигласан худалдаачдын өдрийн дундаж гүйлгээ хямдралын үеэр өмнөх оны мөн үеэс бараг 70 хувиар өсчээ.

AliExpress орон нутгийн үйлчилгээгээ ч өргөжүүлжээ. Платформын Choice хөтөлбөр шинээр хөгжиж буй ихэнх зах зээлийг хамарч, гурваас таван хоногт хүргэх, үнэгүй тээвэрлэх, үнэгүй буцаах үйлчилгээ санал болгодог.

Мөн Вьетнам, Норвеги, Танзани, Серби зэрэг улсад орон нутгийн 32 хэлээр үйлчилж, тухайн улсын цахим түрийвчээр төлбөр төлөх боломж олгож байна.