Красноярск хотын орон сууцны хороололд дахин нэг баавгайг буудан устгажээ

Красноярск хотын Свердловский дүүргийн орон сууцны хороололд цагдаа нар баавгайг буудан устгасныг Интерфакс агентлаг мэдээлжээ.

Красноярск хязгаарын Дотоод хэргийн газрын хэвлэлийн албаны мэдээлснээр, өнгөрсөн шөнө Колхозная гудамжаар баавгай орилон явж, айлын нохойг барьж идэх шахсан тухай дуудлага цагдаагийн жижүүрт ирсэн.

Цагдаагийн эргүүл араатныг Боровая гудамжны нэгэн байшингийн дэргэд олжээ. Баавгай түрэмгий авирлаж, цагдаа нар болон ойролцоо байсан оршин суугчид руу чиглэн хөдөлсөн байна.

«Оршин суугчид болон хамтран зүтгэгчдээ хамгаалахын тулд цагдаа галт зэвсэг хэрэглэсэн» гэж мэдэгдэлд дурджээ.

Оршин суугчдаас хэн ч гэмтээгүй.

Баавгай хотод орох нь ихэссэн тул Красноярск хотод онцгой албадад өндөржүүлсэн бэлэн байдлын горим нэвтрүүлснийг өмнө нь мэдээлж байсан. Энэ онд тус хязгаарт хүрэн баавгайн халдлагад есөн хүн өртөж, хойд хэсэгт цагаан баавгайн халдлагад дахин нэг хүн гэмтжээ.

Махчин амьтан хүмүүс рүү халдсантай холбогдуулан хайхрамжгүй байдлын эрүүгийн хэргийг мөрдөн байцаах байгууллага шалгаж байгаа юм.

2026 онд тус бүсэд 2 мянга шахам хүрэн баавгайг устгажээ.