Латвийн агаарын орон зайд гурван нисгэгчгүй онгоц нэвтэрсэн гэж тус улсын Батлан хамгаалах яам мэдэгдэв

11 дүгээр сарын 11-ний шөнө гурван нисгэгчгүй нисэх төхөөрөмж Латвийн агаарын орон зайд нэвтэрсэн гэж тус улсын Батлан хамгаалах яамны хэвлэлийн алба Лхагва гарагт мэдэгджээ. Энэ тухай Интерфакс агентлаг мэдээлэв.

Яамны мэдээлснээр, хоёр нь зүүн хилийг 1-2 минутын турш богино хугацаанд давсан бол нэг нь Латвийн нутгийг Литвээс Эстони чиглэлд өмнөөс хойш дайран нисчээ. Үндэсний зэвсэгт хүчин саатуулагч дрон, агаарын довтолгооноос хамгаалах ангиудыг ажиллуулж, Балтийн орнуудын агаарын орон зайг эргүүлдэг НАТО-гийн сөнөөгч онгоцууд хөөрсөн байна.

Гурван төхөөрөмж бүгд Латвийн агаарын орон зайг орхисон бөгөөд зэвсэгт хүчин НАТО-гийн холбоотнуудтайгаа хамтран шөнийн үйл явдлыг үнэлж, цаашид ажиллагаагаа сайжруулах арга замыг тодорхойлох юм.

Өмнө нь Литвийн Хямралын менежментийн үндэсний төвийн дарга Вильмантас Виткаускас Литвийн агаарын орон зайд нэвтэрсэн дроныг хайхаар Шяуляйн агаарын баазаас НАТО-гийн сөнөөгч онгоцууд хөөрсөн гэж мэдэгдсэн юм. Литвийн хэд хэдэн бүс нутагт агаарын түгшүүр зарлаж, Вильнюс, Каунасын нисэх онгоцны буудлуудын үйл ажиллагааг түр зогсоожээ.

“Дроныг Каунас хотын хил дотор нүдээр тодорхойлсон” гэж Литвийн Зэвсэгт хүчний штабын дарга, контр-адмирал Гедрюс Пременецкас хэлжээ. Түүний хэлснээр, хот суурин газар тул унах хэлтэрхийнээс хохирол учрахаас сэргийлж дроныг устгаагүй байна.

Дрон хотоос гарч Паневежис руу хойд зүг рүү нисэх үед агаарын довтолгооноос хамгаалах онгоцууд түүнийг устгах хоёр оролдлого хийсэн ч амжилтгүй болжээ. Нэг пуужин бай оносонгүй, Латвийн хилийн ойролцоох Биржай хотын орчмоос олдсон бөгөөд дрон Литва-Латвийн хилийг давсан байна.