Лукашенко Оросоос газар нутаг нэхэмжилж байна гэх буруутгалыг үгүйсгэв

Беларусийн Ерөнхийлөгч Александр Лукашенко Брянск мужийн захирагчтай саяхан уулзахдаа Брянск муж хэнийх болохыг бас тодруулах хэрэгтэй гэж хошигносны дараа гарсан Оросоос газар нутаг нэхэмжилж байна гэх буруутгалыг үгүйсгэжээ. Энэ тухай Интерфакс агентлаг мэдээлэв.

«Энд намайг Брянск мужийг Борис Вячеславовичоос өгөхийг шаардаж байгаа мэтээр хөөргөж эхэлсэн. Үгүй ээ, надад ийм зүйл огт байхгүй» гэж Лукашенко мягмар гарагт Минскт Санкт-Петербургийн захирагч Александр Бегловтой уулзахдаа хэлсэн нь Ерөнхийлөгчийн хэвлэлийн албаны мэдээнд дурдагджээ. Тэрбээр Беларусь дахь Оросын элчин сайд Борис Грызловыг хэлж байгаа юм.

Беларусийн тэргүүний хэлснээр, ойрын хэдэн жилд эдгээр хилд юу тохиолдох нь тодорхойгүй бөгөөд магадгүй хүмүүс тэдгээрийг огт хүлээн зөвшөөрөхгүй, дэлхийгээр чөлөөтэй зорчих болно. Тэрбээр хэний газар болох тухайд хэт анхаардаггүй гэдгээ хэлж, Брянск, Смоленск, Псковын хүмүүс Беларусийн хувьд өөрсдийн хүмүүс бөгөөд Беларусь тэдэнд үргэлж нээлттэй, заавал дэмжиж туслах ёстой гэжээ.

Лукашенко Беларусь Оросын хэд хэдэн томоохон хот, бүс нутгийг шаардлагатай бараагаар хангах үүрэг хүлээдэг байсан Зөвлөлтийн үеийн практикийг сэргээхийг санал болгов. Түүний хэлснээр, Зөвлөлтийн үед Беларусь Калининград, Ленинград, Москва мужийг хариуцдаг байсан бөгөөд Ленинград, ялангуяа Калининградад байхгүй бүхнийг үйлдвэрлэж нийлүүлэх үүрэгтэй байжээ. Тэрбээр одоогийн асар том Москваг бүрэн хангаж чадахгүй байх магадлалтай ч юуны түрүүнд эдгээр бүс нутагтай хамтран ажиллах хэрэгтэй гэж үзэж байна.