Москвагийн шүүх Украины Жанжин штабын даргын орлогч асан Артеменког эзгүйд нь баривчлахаар шийдвэрлэв

Москвагийн шүүх Украины Зэвсэгт хүчний Жанжин штабын даргын орлогч асан Артур Артеменког эзгүйд нь баривчлах шийдвэр гаргажээ. Түүний тушаалаар 2017–2019 онд Донбасст буудсаны улмаас 222 хүн шархдаж, амиа алдсан гэж мөрдөн байцаалтынхан үзэж байна. Энэ тухай шүүхийн материалтай танилцсан РИА Новости агентлаг мэдээлэв.

Артеменког ОХУ-ын Эрүүгийн хуулийн 356 дугаар зүйлийн 1 дэх хэсэгт заасан дайн хийх хориотой арга, хэрэгслийг хэрэглэсэн гэмт хэрэгт буруутгаж байна.

Үүнээс өмнө ОХУ-ын Дотоод хэргийн яамны эрэн сурвалжлах санд түүнийг эрэн сурвалжилж буй тухай РИА Новости мэдээлж байсан.

ОХУ-ын Мөрдөн байцаах хороо мөн түүнийг эзгүйд нь яллагдагчаар татсан гэж мэдэгдэж байжээ.

Мөрдөн байцаалтын хувилбараар Артеменко 2017 оны хоёрдугаар сараас 2019 оны долоодугаар сар хүртэл Жанжин штабын даргын орлогчоор ажиллахдаа Украины цэргүүдэд Донбассыг буудах үүрэг өгч байжээ.

Үүний улмаас 17 хүүхэд багтсан 222 хүн шархдаж, амь үрэгдсэн гэж мөрдөн байцаалтынхан үзэж байгаа юм.