Номхон далайн зарим хэсэг бичил хуванцраас болж илүү цэнхэр, ногоон болсон байж болзошгүйг судалгаа харуулжээ

Номхон далайн хог хаягдлын бүсийн зарим хэсгийн усны өнгө 2002-2022 онд илт цэнхэр, ногоон болж өөрчлөгдсөн нь далайн усан дахь бичил хуванцрын агууламж нэмэгдсэнтэй холбоотой байж болзошгүйг Чайна Ньюс сайт мэдээлжээ.

Спрингер Нэйчер группын Коммюникейшнз Эрт энд Энвайронмент сэтгүүлд нийтлэгдсэн судалгаанд эрдэмтэд хиймэл дагуулын хяналтын мэдээлэлд шинжилгээ хийсэн байна.

Диаметр нь 300 микроноос бага бичил хуванцрын бохирдлыг шууд хэмжихэд хүн хүч их шаардагддаг тул өргөн хүрээнд хэрэглэх боломжгүй. Гэвч лабораторийн туршилтаар энэ хэмжээний бичил хуванцар тодорхой оптик шинж чанартай нь тогтоогдсон тул алсын зайнаас хэмжих боломж бий.

Норвегийн Бергений их сургуулийн Ши Читэм тэргүүтэй судлаачид зүүн хойд Номхон далайн хиймэл дагуулын гурван мэдээллийн санд шинжилгээ хийж, хог хаягдлын бүс болон түүний орчмын ус цэнхэр, ногоон долгионы урт дээр мэдэгдэхүйц гэрэлтсэнийг илрүүлжээ.

Бичил хуванцар оруулсан загварчлалд хөх ногоон өнгийн гэрэлтэлт 13 хувийн давтамжтай гарсан нь зөвхөн байгалийн хүчин зүйлтэй загварын 3 хувиас дөрөв дахин их байв.

Гэвч өөр өөр хиймэл дагуулын мэдээлэлд өнгөний өөрчлөлтийн тооцоо зөрүүтэй байгаа тул үр дүнг батлахын тулд хог хаягдлын бүсийн бичил хуванцрын агууламжийг шууд хэмжих шаардлагатай гэж судлаачид анхааруулжээ.

Далайн усны нэг шоо метрт бичил хуванцрын агууламж 5 миллиграмм орчимд хүрэхэд хиймэл дагуулын мэдрэгч ийм гэрэлтэлтийг илрүүлж чадна.