Норвеги Финляндын араас Орос, Беларусийн тамирчдыг нутагтаа оруулахгүй байхаар бэлтгэж байна

Норвегийн Хууль зүй, нийгмийн аюулгүй байдлын яамнаас Гадаадын иргэдийн асуудал эрхэлсэн газар болон Цагдаагийн ерөнхий газарт Орос, Беларусийн тамирчдыг тус улсад нэвтрүүлэхгүй байх үүрэг даалгавар өгөхөөр болсныг засгийн газар мэдэгдлээ.

Энэ нь тэмцээнд оролцохоор Норвегид ирж буй тамирчид болон тэднийг дагалдах ажилтнуудад хамааралтай.

Норвегид Орос, Беларусийн иргэдэд виз олгох, нэвтрүүлэх хатуу журам аль хэдийн мөрдөгдөж байна. Гэвч олон улсын спортын холбоод дүрмээ зөөлрүүлснээр Орос, Беларусийн дээд түвшний тамирчид болон дагалдах ажилтнууд Норвегид тэмцээнд оролцохоор ирэх нь олширчээ. Засгийн газар Украинд дайн үргэлжилж байх хугацаанд эдгээр орны мэргэжлийн тамирчид, дагалдах ажилтнуудыг Норвегид оруулахгүй байх бодолтой байна.

Өөрчлөлт “ойрын хугацаанд” хүчин төгөлдөр болно гэж засгийн газар мэдэгдэв.

Үүнээс өмнө Финлянд оросуудыг нэвтрүүлэх журмаа чангатгаснаа зарласан. “Оросын түрэмгийллийн дайн үргэлжилж байхад Оросын тамирчдад Финляндад хийх юм алга” гэж тус улсын Гадаад хэргийн сайд Элина Валтонен тайлбарлажээ. Хязгаарлалт төвийг сахисан статустай оролцдог тамирчдад ч хамаарна. Арваннэгдүгээр сарын 20-оос 22-нд Хельсинкид уран гулгалтын Гран-при тэмцээний нэг шат болно. Оросын уран гулгагчид тэнд оролцохоор төлөвлөж байжээ.

Спортын арбитрын шүүх Оросын хоккейн шигшээ багийг олон улсын тэмцээнд эргүүлэн оролцуулах шийдвэр гаргасны дараа ийм хязгаарлалт тогтоож эхэлсэн юм. Оросын шигшээ баг оролцох бол уг багтай тоглохгүй, тэмцээн зохион байгуулахгүй гэдгээ хэд хэдэн улс аль хэдийн мэдэгдсэн байна.