ОХУ-ын ГХЯ: Оросын эсрэг хориг арга хэмжээг ойрын зургаан жилд цуцлахгүй байх магадлалтай

Москвагийн барууны өрсөлдөгчдийн үйлдлийг шинжлэхэд Оросын эсрэг хориг арга хэмжээг ойрын зургаан жилд цуцлах магадлал бага байна гэж ОХУ-ын Гадаад хэргийн яамны тусгай үүрэг гүйцэтгэгч элчин сайд Александр Трофимов дугуй ширээний уулзалтын үеэр мэдэгджээ.

“Дунд хугацаанд, өөрөөр хэлбэл зургаан жилийн дотор Оросын эсрэг хориг арга хэмжээг цуцална гэж хүлээх нь бодит бус” гэж Трофимов онцолжээ.

Барууны тавьсан хязгаарлалт бол Москвагаас улс төрийн буулт хийлгэх дарамтын хэрэгсэл тул хориг арга хэмжээ гэж нэрлэх нь оновчгүй гэж дипломатч үзэж байна. Ингэж барууны орнууд өөрсдийн геополитикийн зорилтоо хэрэгжүүлэхийг оролдож байна гэж тэрбээр хэлжээ.

Европын холбооны орнуудад Орост дарамт үзүүлэх хөшүүрэг үлдээгүй гэж ОХУ-ын Гадаад хэргийн дэд сайд Александр Панкин арваннэгдүгээр сарын 8-нд мэдэгдсэн юм. Салбарын хязгаарлалтын талаар тохиролцох нь Европын холбоонд улам хэцүү болж байгааг тэрбээр онцолсон байна.

Аравдугаар сарын 12-нд Оросын эсрэг баталсан арга хэмжээг албан ёсоор ээлжит, 22 дахь хоригийн багц гэж нэрлээгүй нь энэ хандлагыг баталж байна гэж Панкин үзжээ.

Украины мөргөлдөөнийг зохицуулахад ойрын хугацаанд ахиц гарлаа ч барууны орнууд Оросын эсрэг хоригоо цуцлахгүй байх магадлалтай гэдгийг Гадаад хэргийн яамны Эдийн засгийн хамтын ажиллагааны газрын дарга Дмитрий Биричевский арваннэгдүгээр сарын 2-нд онцолжээ. Европын зарим улсын Москвагийн талаарх байр суурь урт хугацааны шинжтэй гэж тэрбээр хэлсэн байна.