ОХУ-ын засгийн газар нисэх онгоц үйлдвэрлэлийг дэмжихийн тулд тасалбар бүрт 500-1000 рубль нэмэхийг санал болгов

Онгоц үйлдвэрлэх томоохон хөтөлбөрийг дэмжих зорилготой агаарын зорчигчдоос авах шинэ хураамж тасалбар бүрд 1000 рубль хүртэл байж болох юм. Энэ тухай Төрийн Думын төсөв, татварын хорооны холбооны төсвийн төслийн талаарх дүгнэлтэд дурдсан гэж Интерфакс агентлаг мэдээлснийг Медуза хэвлэл дамжуулжээ.

Олон улсын нислэгт 1000 рубль, дотоодын нислэгт 500 рубль авах бөгөөд хураамжийг 2027 оноос нэвтрүүлж магадгүй юм.

Коммерсант сонин 9 дүгээр сарын сүүлээр эх сурвалжаас иш татан хураамжийн тухай анх мэдээлсэн. Сонины мэдээлснээр, мөнгөний нэг хэсгийг онгоцны өртөг болон агаарын тээврийн компаниудад хөнгөлөлттэй үнээр нийлүүлэх үнийн зөрүүг нөхөхөд лизингийн компаниудад, нөгөө хэсгийг онгоцны ашиглалтын өндөр зардлыг нөхөхөд агаарын тээврийн компаниудад олгоно.

Орост дотоодын онгоцны үйлдвэрлэлийг олон дахин нэмэгдүүлэх нисэхийн салбарыг хөгжүүлэх хөтөлбөрийг 2023 онд баталсан. Хөтөлбөрөөр 2025 онд 80, 2026 онд 120 онгоц үйлдвэрлэх ёстой байсан ч бодит байдал дээр агаарын тээврийн компаниуд түүнээс хойш нэг ч онгоц аваагүй бөгөөд шинэ онгоцууд 2027 оноос өмнө нисэхгүй гэж үзэж байна.

2025 оны 9 дүгээр сараас эхлэн агаарын зорчигчдоос нисэх онгоцны буудлын сэргээн засварлалтын хураамж болгон хүн бүрээс 150 рубль авч байгаа бөгөөд энэ хураамжийг жил бүр инфляцаар индексжүүлэх ёстой.