Өмнөд Африкийн парламентын дарга асан Маписа-Нкакулагийн авлигын шүүх хуралд шинэ гэрч мэдүүлэг өгөх төлөвтэй

Өмнөд Африкийн Үндэсний ассамблейн дарга асан Носививе Маписа-Нкакулагийн авлигын хэргийн шүүх хуралд өмгөөлөгчийн талын шинэ гэрч Баасан гарагт мэдүүлэг өгөх төлөвтэй байна.

Батлан хамгаалахын сайд байх үетэй нь холбоотой авлигын 12, мөнгө угаасан нэг зүйл ангиар түүнийг яллаж байна.

Прокурорын тал түүнийг цэргийн нэгэн гүйцэтгэгчээс 266 мянган ам.долларын хахууль нэхэж, оронд нь нөлөөгөө ашиглан тендер авахуулахаар амласан гэж буруутгаж байна.

Прокурорын хэлснээр, Маписа-Нкакула эцэст нь 130 мянган ам.доллар авч, өөрийнх нь байшинг засварласан гүйцэтгэгчдэд бэлнээр төлсөн байна.

Тэрбээр бүх буруутгалыг үгүйсгэсэн байна. Буруутгалууд гарч байх үед буюу 2024 оны гуравдугаар сард тэрбээр парламентын даргын албан тушаалаасаа огцорсон юм.

Мэдүүлэг өгөхөд дургүй байгаа өөр хоёр гэрчийг шүүхэд дуудах хуудас илгээж байгаа гэж түүний өмгөөлөгч мэдэгджээ. Тэд Батлан хамгаалах хүчний санхүүгийн хэлтсийн ажилтнууд юм.

Есдүгээр сарын 9-нд мэдүүлэг өгч байхдаа Маписа-Нкакулагийн бие муудсанаас шүүх хурал завсарласан юм. Тэрбээр Лхагва гарагт Претория дахь Гаутенгийн дээд шүүхэд эргэн ирж мэдүүлгээ үргэлжлүүлжээ.

Тэрбээр шүүхэд ирээгүй тул аравдугаар сарын 2-нд түүнийг баривчлах тушаал гарсан ч уг тушаалын биелэлтийг дараагийн товлосон хурал болох энэ Лхагва гараг хүртэл хойшлуулсан байна.

Шүүх хурал арваннэгдүгээр сарын 20 хүртэл үргэлжлэх хуваарьтай.