Өмнөд Африкт Хятадын шинэ жилийн өмнө абалоныг хулгайгаар агнах явдал нэмэгдэх төлөвтэй байна

Өмнөд Африкийн Гкеберха хотод хамгаалалттай нялцгай биет абалоныг хууль бусаар агнах явдал үргэлжилсээр байгаа ба Хятадын шинэ жилийн өмнө эрэлт өсөхөд огцом нэмэгдэх төлөвтэй гэж Дейли Маверик сонин мэдээлжээ.

Хулгайн анчид зуны тааламжтай цаг агаарыг ашиглан орлогоо нэмэгдүүлэхийг зорьдог ч хувийн хамгаалалтын ажилтнууд баярын улирлын дараах долоо хоногуудад илүү санаа зовж байна.

«Нельсон Манделагийн булангийн хаднаас хууль бусаар агнасан абалоны дийлэнх нь Ази руу явдаг» гэж Дарк Уотер Опс компанийн үйл ажиллагааны менежер Дейв Кнуп хэлжээ.

Кнупын хэлснээр тэдний баг сүүлийн долоо хоногуудад хариуцсан нутагтаа 700-1000 ширхэг абалон илрүүлсэн бөгөөд хууль бус үйл ажиллагааны ихэнх нь эргийн бусад хэсэг рүү шилжсэн байна.

Цагдаа 11 дүгээр сарын 3-нд хийсэн хамтарсан ажиллагаагаар нэгэн машинаас 207 кг жинтэй 1935 ширхэг хууль бус абалон хурааж, 21 настай залууг баривчилжээ.

Кнуп хар зах дээрх эрэлт одоохондоо тогтвортой байх ч 2 дугаар сарын үед огцом өснө гэж таамаглаж байна.