Өмнөд Солонгос АНУ-тай хийх сургуулилтын талаарх Оросын шүүмжлэлийг няцаажээ

Өмнөд Солонгос АНУ-тай хамтран хийдэг цэргийн сургуулилтын талаарх Оросын шүүмжлэлийг пүрэв гарагт няцаасан гэж Ёнхап агентлаг мэдээлэв.

Оросын Гадаад хэргийн яамны төлөөлөгч эдгээр сургуулилтыг Хойд Солонгосын эсрэг, тэр дундаа цөмийн зэвсгээр урьдчилан цохилт өгөх дадлага хийх зорилготой гэж мягмар гарагт мэдэгджээ. Тэрбээр Сөүлд хандан аюулгүй байдлаа хангах Пхеньяны бүрэн эрхийг хүндэтгэ гэж уриалсан байна.

«Өмнөд Солонгос, АНУ-ын хамтарсан цэргийн сургуулилт хамгаалалтын шинжтэй бөгөөд Хойд Солонгосын цөмийн болон пуужингийн аюул нэмэгдэж буй нөхцөлд нэгдсэн хамгаалалтын хүчирхэг чадавхаа хадгалах зорилгоор жил бүр явагддаг» гэж Өмнөд Солонгосын Гадаад хэргийн яам мэдэгдэлдээ дурджээ.

Яамны хэлснээр эдгээр сургуулилт Солонгосын хойгоос гадна Зүүн хойд Азийн энх тайван, тогтвортой байдалд хувь нэмэр оруулдаг.

Сөүл, Вашингтон хамтарсан сургуулилтаа жилийн турш явуулдаг бөгөөд үүнд томоохон хэмжээний тогтмол сургуулилт, хээрийн дадлага багтдаг.

Хойд Солонгос, Орос харилцан хамгаалах заалт бүхий иж бүрэн стратегийн түншлэлийн гэрээг 2024 онд байгуулснаас хойш цэргийн харилцаагаа гүнзгийрүүлж байна.