Өмнөд Солонгос Садогийн уурхайн албадан хөдөлмөрийн түүхийг бүрэн хүлээн зөвшөөрөхийг Японд уриалав

Өмнөд Солонгос Садогийн уурхайн цогцолборт дайны үед албадан ажиллуулсан түүхийг бүрэн хүлээн зөвшөөрөхийг Баасан гарагт Японд уриалж, албадан хөдөлмөрийн солонгос хохирогчдод зориулсан тусдаа дурсгалын ёслолыг гурав дахь жилдээ зохион байгууллаа.

Ниигата мужийн Садо арлын нэгэн зочид буудалд болсон ёслолын үеэр Японд суугаа Өмнөд Солонгосын Элчин сайд Ли Хёк ийнхүү уриалжээ. Ёслолд хохирогчдын ар гэрийн есөн хүн оролцов.

“Японы колонийн ерөнхий захирагчийн газрын оролцоотойгоор засгийн газраас зохион байгуулсан ажилд хуваарилах, албадан татах замаар олон солонгос ажилчдыг хүсэлгүйгээр нь дайчилж, уурхайд албадан ажиллуулсан” гэж Ли Хёк дурсгалын үгэндээ хэлжээ.

“Өнгөрсний зовлонг дурсаж, өнөөдөр энд эмгэнэл илэрхийлэх нь бидний харилцан ойлголцол, эдгэрлийг гүнзгийрүүлж, Дэлхийн өвд бүртгэгдсэн Садогийн уурхайн түүхийг бүхэлд нь ойлгох боломжийг хүн бүрт олгоно” гэж тэрбээр нэмж хэлсэн байна.

Японы 1910-45 оны колоничлолын үед 1500 гаруй солонгос хүнийг Садогийн уурхайд ажиллуулахаар дайчилсан юм. Тэдний олонх нь газар доорх аюултай ажилд томилогдож, зарим нь тэнд гарсан осолд амиа алдсан гэж түүхэн баримт болон албаныхны мэдээлэлд дурдсан байна.

Япон 2024 онд Садогийн уурхайн цогцолборыг ЮНЕСКО-гийн Дэлхийн өвийн жагсаалтад бүртгүүлэхийн тулд Өмнөд Солонгосын дэмжлэгийг хүсэхэд хоёр улс тэнд жил бүр дурсгалын ёслол хийхээр тохиролцсон юм. Сөүл тухайн үед солонгосчуудын албадан хөдөлмөр зэрэг тус уурхайн бүх түүхийг хүлээн зөвшөөрөхийг Токиогоос шаардаж байв.

Харин Токио 2024 онд анхны ёслолд бэлтгэх үеэс эхлэн солонгос ажилчдыг албадан дайчилсныг хүлээн зөвшөөрөхөөс татгалзсаар ирсэн тул Өмнөд Солонгос жил бүр тусдаа ёслол зохион байгуулах болжээ.

ЮНЕСКО-гийн Дэлхийн өвийн хороо 2026 оны долдугаар сард баталсан шийдвэртээ солонгос ажилчдыг албадан дайчилсан үеийг багтаасан “бүх түүхийг” Садогийн уурхайн тайлбар, танилцуулгад хэрхэн тусгаж байгааг тодруулахыг Японд уриалжээ.

Хороо мөн 2027 оны арванхоёрдугаар сар гэхэд хэрэгжилтийн тайлан ирүүлэхийг Японд уриалсан байна.