Өмнөд Солонгосын цэргийн шүүх гишүүн Бу Сын Чанийг цэргийн нууц задруулсан хэрэгт цагаатгажээ

Өмнөд Солонгосын цэргийн шүүх эрх баригч Ардчилсан намын гишүүн Бу Сын Чанийг Батлан хамгаалах яамны хэвлэлийн төлөөлөгч байхдаа цэргийн нууц задруулсан хэргээр Мягмар гарагт цагаатгажээ гэж Кореа Таймс сонин мэдээлэв.

Бу Сын Чанийг 2023 оны 7 дугаар сард Цэргийн нууц хамгаалах тухай хуулийг зөрчсөн хэргээр яллагдагчаар татсан юм.

Тэрбээр номдоо хуучин Батлан хамгаалах сайд Со Ук, тухайн үеийн АНУ-ын Батлан хамгаалах сайд Ллойд Остин нарын 2021 оны 12 дугаар сард хийсэн нийтэд ил болоогүй яриаг дэлгэсэн гэж буруутгагдаж байв.

Нууц задарсан нь үндэсний аюулгүй байдалд илэрхий заналхийлэл учруулна гэдгийг нотлох баримт хангалтгүй гэж шүүх үзжээ. Цэргийн прокурор өмнө нь таван жилийн хорих ял оноохыг хүсчээ.

Бу Сын Чан цэргийн нууц задруулаагүй гэж маргаж, хуучин Ерөнхийлөгч Юн Сок Ёлийн оршин суух газрыг нүүлгэхэд мэргэ төлөгч оролцсон тухай номдоо бичсэнийх нь хариу арга хэмжээ гэж тайлбарлаж байв.

Чонгон нэртэй мэргэ төлөгч 2022 онд оршин суух газрын нэр дэвшсэн байршлуудад очсон гэсэн мэдэгдэл маргаан дагуулсан юм.

Тэрбээр 2021 оны хэлэлцээтэй холбоотой албан нууц задруулсан хэргээр мөн байцаагдсан ч 5 дугаар сард цагаатгагдсан байна.