Орос энэ онд 143 мянга гаруй цагаачийг улсаас албадан гаргахаар шийдвэрлэжээ

Энэ оны эхний есөн сард гадаадын иргэдэд захиргааны зөрчлийн 1.8 сая протокол үйлдэж, 143 мянга гаруй цагаачийг Оросоос албадан гаргахаар шийдвэрлэснийг ОХУ-ын Аюулгүй байдлын зөвлөлийн ажлын албаны хэвлэлийн алба Пүрэв гарагт мэдэгджээ.

“2026 оны нэгдүгээр сараас есдүгээр сард гадаадын иргэдэд захиргааны зөрчлийн 1.8 сая протокол үйлдсэн. Эдгээр зөрчлийн төлөө тэднийг захиргааны журмаар улсаас албадан гаргах 143.1 мянган шийдвэр гаргасан нь 3 дахин өссөн үзүүлэлт” гэж мэдэгдэлд дурджээ.

Гадаадын иргэний түр оршин суух хугацааг богиносгох шийдвэрийн тоо 2025 оны мөн үеийнхээс 2.5 дахин өсөж, энэ онд 78.7 мянган хүнд хамаарсныг Аюулгүй байдлын зөвлөл тэмдэглэсэн байна.

Хэвлэлийн албаны мэдээлснээр, есөн сарын хугацаанд 4.8 мянга орчим гадаадын иргэнийг депортацийн журмаар буцааж, 290.8 мянга орчим хүнийг Орост нэвтрүүлээгүй аж.

“2026 оны нэгдүгээр сараас есдүгээр сард ОХУ-д гадаадын 6.9 сая иргэн, харьяалалгүй хүн ирсэн нь 2025 оны мөн үеийнхээс 9 хувиар бага байна. Энэ урсгалын 4.7 сая хүн буюу 68.7 хувь нь ТУХН-ийн гишүүн орны иргэд” гэж мэдэгдэлд онцолжээ.

Олгосон түр оршин суух зөвшөөрөл 17.1 хувиар буурч 19.5 мянга, оршин суух зөвшөөрөл 43 хувиар буурч 58.5 мянга болсон бөгөөд буурах хандлага үргэлжилсээр байна гэж тус алба мэдэгдэв.