Орос Их Британийн цэргийн үйлдвэрийн долоон удирдлагыг хар жагсаалтад оруулжээ

Москва Лондонгийн дайсагнасан Оросын эсрэг бодлогын хариуд Их Британийн цэргийн үйлдвэрийн удирдлагын долоон төлөөлөгчийг Орост нэвтрэхийг хориглосныг Оросын Гадаад хэргийн яам мэдэгджээ. Энэ тухай Интерфакс агентлаг мэдээлэв.

Яамны сайтдаа нийтэлсэн мэдэгдэлд Лондон Киевийг зэвсэглэх хүчин чармайлтаа нэмэгдүүлж байгааг буруутгаж, Оросын гүнд цохилт өгөхөд ашиглагдаж буй зэвсэг, цэргийн технологийг Киевт нийлүүлж буй Их Британийн цэргийн үйлдвэрүүдийн удирдлагын төлөөлөгчдийг хар жагсаалтад оруулах шийдвэр гаргасан гэжээ.

Хар жагсаалтад холын тусгалын пуужин бүтээх төсөлд оролцож буй Ротрон Аэроспейс компанийн гүйцэтгэх захирал Алекс Эдвард Хэд, тус компанийн цэргийн ахлах зөвлөх Кев Оливер, төлөөлөн удирдах зөвлөлийн дарга Жорж Замбеллас багтжээ. Мөн тус төсөлд оролцож буй Эм Жи Ай Инжиниринг компанийн гүйцэтгэх захирал Роберт Майкл Гаскойн, дрон үйлдвэрлэгч Маллой Аэронотикс компанийн гүйцэтгэх захирал Нил Эплтон нар жагсаалтад орсон. Түүнчлэн тагнуулын нисгэгчгүй нисэх төхөөрөмж үйлдвэрлэдэг Текевер Юкей компанийн захирал, үүсгэн байгуулагчдын нэг Пол Уэбб, БАЕ Системс компанийн технологи, мэдээллийн хэлтсийн дарга Жулиан Фредерик Чарльз Крэкнелл нар ч багтжээ.

Яамны мэдэгдэлд Их Британийн эрх баригчдын дайсагнасан үйлдлийн хариуд Оросын хар жагсаалтыг өргөжүүлэх ажил үргэлжилнэ гэжээ.