Орос, Төв Азийн нефтийн экспорт 9 дүгээр сард 2 хувиар өссөн гэж ОПЕК тооцоолжээ

Орос, Төв Азийн орнуудын нефтийн нийт экспорт 9 дүгээр сард хоногт дунджаар 6.9 сая баррель болж, 8 дугаар сараас 147 мянган баррель буюу 2 хувиар өссөн гэж ОПЕК сар тутмын тайландаа дурджээ. Энэ тухай Интерфакс агентлаг мэдээлэв.

2025 оны 9 дүгээр сартай харьцуулахад экспорт хоногт 283 мянган баррель буюу 4 хувиар буурсан байна.

Транснефть компанийн системээр дамжуулсан экспорт 8 дугаар сараас 134 мянган баррель буюу 13 хувиар өсч, хоногт 4.1 сая баррельд хүрчээ. Балтийн тэнгисийн боомтуудаар ачсан нефть 112 мянган баррель буюу 6 гаруй хувиар өсч, хоногт 1.9 сая баррель болжээ.

Хятад руу ВСТО хоолойгоор нийлүүлсэн нефть 33 мянган баррель буюу 5 хувиар буурч, хоногт 589 мянган баррель болсон бол Номхон далайн Козьмино боомтоор дамжих нийлүүлэлт 1 хувиар өсч хоногт 1 сая баррелиас давжээ.

Хар тэнгисийн бүсийн КТК терминалын экспорт 31 мянган баррель буюу 2 орчим хувиар өсч хоногт 1.6 сая баррель болсон бол Баку-Тбилиси-Жейхан хоолойн нийлүүлэлт 2 мянган баррелиар буурчээ.

Орос, Төв Азийн нефтийн бүтээгдэхүүний экспорт 9 дүгээр сард 53 мянган баррель буюу 5 орчим хувиар буурч хоногт 1 сая баррель болсон нь өмнөх оны мөн үеэс 49 хувиар бага байна. Мазут, газойлын экспорт буурсан ч нафтын нийлүүлэлт өссөн байна.