Орос ЕЗ-ийн Парламентын Ассамблей дахь сөрөг хүчний төлөөлөгчдийг хүсээгүй байгууллагаар зарлав

Оросын Хууль зүйн яам Европын Зөвлөлийн Парламентын Ассамблей дахь Оросын ардчилсан хүчнүүдтэй хийх яриа хэлэлцээ бүлгийг хүсээгүй байгууллагын жагсаалтад оруулжээ. Энэ тухай Москоу Таймс мэдээлэв.

Оросын цөллөгчдийн энэ төлөөлөгчдийн бүлгийг экс бизнесмэн Михаил Ходорковский зэрэг сөрөг хүчний тэргүүлэгчид олон жил лоббидсоны эцэст нэгдүгээр сард байгуулсан юм. Бүлгийн гишүүдээс тэрс үзэлтэн Владимир Кара-Мурза, Пусси Райот хамтлагийг үүсгэн байгуулагчдын нэг Надя Толоконникова нар Орост эрүүгийн мөрдлөгт өртөөд байна.

Оросын хуулиар хүсээгүй байгууллагатай холбогдсон хүн дөрвөн жил хүртэл, ийм бүлгийн үйл ажиллагааг зохион байгуулсан хүн зургаан жил хүртэл хорих ял авч болно.

Ерөнхий прокурорын газар аравдугаар сарын 21-нд, Хууль зүйн яам пүрэв гарагт энэ шийдвэрийг баталсан ч аль аль нь албан ёсоор тайлбар өгөөгүй байна.

Хууль зүйн яам мөн өдөр Орост цензурдэж, хориглосон номуудыг хэвлэх зорилгоор 2023 онд Словакт байгуулагдсан Видим Букс хэвлэлийн газар зэрэг гадаадын өөр 11 байгууллагыг хар жагсаалтад оруулжээ.

Орос Украин руу бүрэн хэмжээний түрэмгийлэл эхлүүлсний дараахан 2022 оны гуравдугаар сард 26 жил гишүүнээр байсан Европын Зөвлөл болон түүний Парламентын Ассамблейгаас хөөгдсөн юм. 2015 онд нэвтрүүлсэн хүсээгүй байгууллагын статусыг хараат бус хэвлэл, иргэний нийгэм, сөрөг хүчний үйл ажиллагааг хязгаарлахад ашиглаж, Москоу Таймс зэрэг хэдэн зуун байгууллагыг жагсаалтад оруулаад байна.