Оросын дизель түлш импортолсон компаниудыг шоронд хоригдож болзошгүйг АНУ-ын конгрессмен анхааруулав

Оросын дизель түлш импортолсон Америкийн компаниуд 1 сая ам.доллар хүртэлх торгууль, 20 хүртэл жилийн хорих ял зэрэг эрүүгийн хариуцлага хүлээж болзошгүйг АНУ-ын Ардчилсан намын конгрессмен Жейми Раскин анхааруулжээ. Энэ тухай Ведомости сонин мэдээлэв. Раскины захидлыг Төлөөлөгчдийн танхимын Хууль зүйн хорооны сайтад нийтэлсэн бөгөөд Америкийн газрын тосны хүрээлэн, АНУ-ын Худалдааны танхим, Түлш, нефть химийн үйлдвэрлэгчдийн холбооны удирдлагад хаягласан байна.

Раскин Оросын дизель түлш худалдан авахад оролцсон компаниуд иргэний болон эрүүгийн хариуцлага хүлээх эрсдэлтэйг анхааруулав. Түүний үзэж буйгаар, Ерөнхийлөгч Дональд Трампын засаг захиргаа хориг арга хэмжээг түр сулруулсан ч 2022 онд хуулиар тогтоосон Оросын эрчим хүч импортлох хоригийг хүчингүй болгохгүй. Хязгаарлалтыг цуцлахын тулд Конгресстэй зөвлөлдөх зэрэг хуульд заасан журмыг баримтлах ёстой ч засаг захиргаа үүнийг хийгээгүй гэж Раскин үзэж байна.

Хорооны мэдэгдэлд дурдсанаар, зөрчлийн иргэний торгууль хэлцлийн үнийн дүнгээс хоёр дахин их хэмжээнд хүрч болох бөгөөд эдгээр зөрчлийн хөөн хэлэлцэх хугацаа 10 жил байна.

АНУ-ын Сангийн яам 10 дугаар сарын 9-нд Оросын дизель түлшийг АНУ руу худалдах, тээвэрлэх, импортлохтой холбоотой гүйлгээг зөвшөөрсөн 135 дугаар ерөнхий тусгай зөвшөөрөл олгосон юм. Энэ баримт бичиг 2027 оны 4 дүгээр сарын 7 хүртэл хүчинтэй. Рейтер агентлаг 10 дугаар сарын 23-нд 40 000 тонн Оросын дизель түлш ачсан анхны танкер Нью-Йорк руу явж буйг мэдээлсэн бол Оросын Ерөнхийлөгчийн хэвлэлийн төлөөлөгч Дмитрий Песков АНУ руу түлш нийлүүлэх ажил үргэлжилнэ гэжээ.