Зорчигчид турах нь Америкийн агаарын тээврийн компаниудад 580 сая хүртэл ам.доллар хэмнэж болзошгүй

Америкийн агаарын тээврийн дөрвөн том компани Оземпик эмээр турсан зорчигчдын ачаар 580 сая хүртэл ам.доллар хэмнэж болзошгүйг Жеффериз хөрөнгө оруулалтын банкны шинжээчид тооцоолжээ. Энэ тухай Файнэншл Таймс сонины мэдээллийг Ведомости сонин иш татав. Онгоцны нийт жин багассанаар түлшний зардал буурах юм.

Жишээлбэл, Боинг 737 Макс 8 онгоцонд суусан 178 зорчигчийн дундаж жин 10 хувиар буурвал онгоцны хөөрөх жин 2 хувиар багасч, түлшний зардлыг бууруулах боломжтой. Файнэншл Таймсын бичсэнээр, агаарын тээврийн компаниуд онгоцоо аль болох хөнгөлөхийг хичээж, хоолноос чидун хасах, хөнгөн аяга таваг хэрэглэх, ундааны тэргийг хөнгөлөх зэрэг арга хэрэглэж байна. Юнайтед Эйрлайнс компани бортын сэтгүүлээ илүү нимгэн цаасан дээр хэвлэснээр түлшний зардлаа жилд 300 000 ам.доллараар хэмнэжээ.

2026 онд АНУ, Ираны хооронд Ойрхи Дорнодод өрнөж буй дайн, Орос, Украины байлдааны улмаас дэлхий даяар түлшний нөхцөл байдал хүндэрсэн. Ираны цохилтын улмаас Ормузын хоолой хаагдаж, Персийн булангийн орнуудын түлшний байгууламжууд гэмтсэн бол Украины халдлага Оросын төв хэсгийн хэд хэдэн газрын тос боловсруулах үйлдвэрийг онилжээ.

Оросын Тээврийн яам 9 дүгээр сарын эхээр түлшний хямралын үеэр тус улсад онгоцны түлшний хомсдол байхгүй гэж мэдэгдсэн юм. Тээврийн сайд Андрей Никитин бэрхшээл байгаа, цаашид ч гарч болохыг хүлээн зөвшөөрсөн. Гэвч эрх баригчид онгоцны керосины нөөцийг харж байгаа бөгөөд нөөц нисэх буудлуудад цагтаа хүрч байна гэж тэрбээр тодруулжээ.