Оросын Эрүүл мэндийн яам зүрх судасны хүнд өвчний дараа үнэгүй эм олгох хөтөлбөрийг өргөжүүлэхийг санал болгов

Оросын Эрүүл мэндийн яам судасны хүнд эмгэгийн дараа өвчтөнүүдийг үнэгүй эмээр хангах хөтөлбөрийг өргөжүүлэхийг санал болгож байна. Ингэснээр зүрх судасны цочмог эмгэг давтагдах эрсдэлийг бууруулна гэж яамны хэвлэлийн алба мягмар гарагт мэдэгдсэнийг Интерфакс агентлаг мэдээлэв.

Саналын дагуу зүрхний шигдээс, тархины харвалт, судсанд стент тавиулах, зүрхний мэс засал зэрэг зүрх судасны эмгэгийг даван туулсан, дагалдах хүнд хэлбэрийн дислипидемитэй өвчтөнүүд эмчилгээний эмийг нэмэлтээр авна. Үүний тулд цусны ийлдсийн нийт холестерин 8.0 ммоль/л-ээс, бага нягтралтай липопротеины холестерин 5.0 ммоль/л-ээс эсвэл триглицерид 10 ммоль/л-ээс дээш байх зэрэг үзүүлэлтийн дор хаяж нэг нь илэрсэн байх ёстой.

Яамны мэдээлснээр, эмийн жагсаалтыг өргөжүүлснээр эрсдэл өндөртэй өвчтөнүүдийн эмчилгээний үр нөлөөг сайжруулж, бага нягтралтай липопротеины зорилтот түвшинд хүрч, зүрх судасны цочмог эмгэг давтагдах эрсдэлийг бууруулах боломжтой.

Зүрх судасны цочмог эмгэгийг даван туулсан өвчтөнүүдийг үнэгүй эмээр хангах хөтөлбөр 2020 оноос хэрэгжиж байгаа бөгөөд тэд хоёр жилийн турш эмээ үнэгүй авдаг. Одоогоор хөтөлбөр судасны таван төрлийн хүнд эмгэг, мэс заслыг хамарч байна.

Хөтөлбөр эхэлснээс хойш эмнэлгийн хяналтад байгаа 3.4 сая гаруй хүн эм авчээ. Яамны мэдээлснээр, хөтөлбөрийн ачаар 2019 онтой харьцуулахад зүрхний булчингийн шигдээс дахин өвдөх тохиолдол бараг 40 хувиар буурсан байна.