Пашинян шинэ Үндсэн хуулийг ээлжит бус сонгуульгүйгээр батлах боломжтой гэж үзэж байна

Армений Ерөнхий сайд Никол Пашинян шинэ Үндсэн хууль батлахын тулд парламентын ээлжит бус сонгууль явуулах магадлал бага гэж үзэж байна. Энэ тухай Интерфакс агентлаг мэдээлэв.

«Шинэ Үндсэн хууль батлах заалт манай сонгуулийн хөтөлбөрт байсан. Бид өнгөрсөн сонгуульд олонхын санал авсан тул энэ хөтөлбөрийг хэрэгжүүлэх ёстой. Хэрэгслийн нэг нь ээлжит бус сонгууль байж болно гэж би хэлж байсан ч тийм зүйл болохгүй байх магадлал өндөр бөгөөд сөрөг хүчинд татгалзаж чадахгүй санал тавьж магадгүй» гэж тэрбээр хэвлэлийн брифинг дээр хэлжээ.

Пашинян мөн шинэ Үндсэн хуульд Армений тусгаар тогтнолын тунхаглалыг иш татах ёсгүй бөгөөд тунхаглалын эх «төрийн эсрэг» шинжтэй гэж мэдэгдсэн байна.

Шинэ Үндсэн хуулийг батлахад Пашиняны «Иргэний гэрээ» намд парламентад үндсэн хуулийн олонх хүрэлцэхгүй тул сөрөг хүчний гишүүдийн дэмжлэг шаардлагатай аж. Гадаад хэргийн сайд Арарат Мирзоян аравдугаар сарын 28-нд иргэд бүх нийтийн санал асуулгаар шинэ Үндсэн хуулийг эсэргүүцвэл засгийн газар огцорч болзошгүй гэж парламентад мэдэгдсэн юм.

Армений одоогийн Үндсэн хууль 1990 оны наймдугаар сарын 23-нд батлагдсан тусгаар тогтнолын тунхаглалд үндэслэсэн бөгөөд энэ тунхаглал Армен ССР болон Уулын Карабахыг нэгтгэх тухай шийдвэрт тулгуурладаг. Азербайжаны Ерөнхийлөгч Ильхам Алиев энхийн гэрээ байгуулах нөхцөлийн нэг нь Армен Үндсэн хуулиа өөрчлөх явдал гэж мэдэгдэж байсан.