Путин Гэр бүлийн ипотекийн хөтөлбөрт өөрчлөлт оруулахыг үүрэг болгов

Интерфакс агентлагийн мэдээлснээр, ОХУ-ын Ерөнхийлөгч Владимир Путин хөнгөлөлттэй Гэр бүлийн ипотекийн хөтөлбөрийн нөхцөлд олон хүүхэдтэй гэр бүлийн зээлийн нөхцөлийг сайжруулах өөрчлөлт оруулахыг засгийн газарт даалгажээ. Энэ тухай Төрийн хүн ам зүй, гэр бүлийн бодлогыг хэрэгжүүлэх зөвлөлийн 5 дугаар сарын хуралдааны дүнгээр гаргасан үүрэг даалгаврын жагсаалтад дурдсан байна.

Даалгаварт өмнө өгсөн үүрэг даалгаврыг харгалзан, гэр бүлийн хүүхдийн тооноос хамааран ипотекийн зээлийн дээд хэмжээг ялгавартай тогтоох зэргээр олон хүүхэдтэй гэр бүлийн зээлийн нөхцөлийг сайжруулах боломжийг судлахыг заажээ. Ерөнхийлөгч мөн хүүхэдтэй ажилтнуудын гэр бүлийг дэмжихэд Оросын компаниудын оруулж буй хувь нэмрийг тусгасан стандарт, үнэлгээг төрийн дэмжлэг авагчдыг сонгох шалгуурын нэг болгон ашиглах боломжийг судлахыг үүрэг болгов.

Засгийн газар Төрийн зөвлөлийн Амьдралын дэд бүтэц, Гэр бүл чиглэлийн комиссуудтай хамтран хөдөө орон нутагт амьдардаг гэр бүлийг орон сууцаар хангах одоогийн арга хэмжээг хүүхдийн тоо болон хувийн орон сууц барилгын тэргүүлэх ач холбогдлыг харгалзан ялгавартай нөхцөлтэйгөөр боловсронгуй болгох асуудлыг судлах ёстой.

Кремлийн цахим хуудсанд дурдсанаар, гэр бүлийн уламжлалыг хадгалах зорилгоор архивын лавлах мэдээллийг хиймэл оюун ухааны технологиор таних, хайх зэргээр иргэдийг гэр бүлийн түүхийн нээлттэй архивын баримтын баталгаатай цахим хуулбарт хүртээмжтэй болгох асуудлыг ч судлахыг даалгажээ.

Эрүүл мэндийн яам эрэгтэйчүүдийн дунд нөхөн үржихүйн эрүүл мэндийн асуудлаар эмнэлэгт тогтмол хандах соёлыг төлөвшүүлэх мэдээлэл, сурталчилгааны ажил зохион байгуулж, анхан шатны тусламж үйлчилгээнд эрэгтэй нөхөн үржихүйн тогтолцооны эмгэгийн эмнэлгийн тусламжийн хүртээмжийг хангах арга хэмжээ авах үүрэг хүлээжээ.