Сербийн сонгуульд ялсан «Оюутны жагсаалт» ОХУ-ын эсрэг хориг арга хэмжээ авахгүй гэж мэдэгдэв

Сербийн парламентын сонгуульд ялалт байгуулсан «Оюутны жагсаалт» хөдөлгөөн ОХУ-ын эсрэг хориг арга хэмжээ авах бодолгүй байгааг хөдөлгөөнийг үүсгэн байгуулагчдын нэг, Сербийн Шинжлэх ухаан, урлагийн академийн академич, Белградын их сургуулийн химийн факультетийн профессор Радомир Саичич мэдэгджээ. Энэ тухай РИА Новости агентлаг мэдээлэв.

«Хөтөлбөртөө дурдсанчлан, Оюутны жагсаалт ОХУ-ын эсрэг хориг арга хэмжээ авахыг дэмждэггүй» гэж тэрбээр хэлэв. Саичичийн хэлснээр, Серби өөрөө хориг арга хэмжээг туулж үзсэн тул энэ нь асуудлыг шийдэх арга биш гэдгийг ойлгодог бөгөөд асуудлыг хориг арга хэмжээгээр бус яриа хэлэлцээ, тохиролцоогоор шийдэх ёстой.

Ням гарагт болсон парламентын сонгуулийн дүнгээр сөрөг хүчний иргэний бүлэг болох «Оюутны жагсаалт» 52.54 хувийн санал авч ялсан бол хуучин Ерөнхийлөгч Александр Вучичийн «Нэгдсэн Серби» эвслийг сонгогчдын 39.29 хувь нь дэмжжээ. Вучич даваа гарагийн шөнө дэмжигчдээ ялагдсаныг хүлээн зөвшөөрч, шинэ эрх баригчид хавар гэхэд ОХУ-ын эсрэг хориг арга хэмжээ авч магадгүйг үгүйсгээгүй юм.

Хөдөлгөөний төлөөлөгчид сонгуулийн хөтөлбөртөө Сербийн цэргийн төвийг сахих байдлыг хадгалах, ОХУ болон аль ч улсын эсрэг хориг арга хэмжээ авахаас татгалзах, Косово ба Метохияг Сербийн бүрэлдэхүүнд хадгалахыг дэвшүүлж байжээ.