Шонхорын ангийн улирал Абу-Дабийн эмиратчуудыг цөлд дахин нэгтгэж байна

Абу-Дабийн Байгаль орчны агентлаг шонхороор ан хийх улирлыг 10 дугаар сарын 20-нд нээсэн бөгөөд улирал 1 дүгээр сарын 31 хүртэл үргэлжилнэ гэж Зэ Нэшнл сонин мэдээлжээ.

Аль-Айн бүсийн Ремах орчмын манхан дээр үдээс хойшхи халуун намжихад шонхорчид мажлист цуглан араб кофе ууж, жимс идэн, яриа дэлгэдэг. Залбирал дуусаж, нар жаргаж эхлэхэд тэдний анхаарал ан руу шилждэг байна.

Шонхорын тухай Инстаграм хуудас хөтөлдөг Аммар бин Хумайд Аль Марри сэрүүн саруудад өдөр бүр цөлд гардаг. Тэрбээр энэ удаа шилдэг шувуудынхаа нэг болох Шаманыг авчирч, сүүлний өдөнд нь байршил тогтоогч зүүсэн байв. «Шувуу бүр тодорхой олз агнадаг тул аль ч шувууг дураараа тавьж болохгүй» гэж Аль Марри хэлжээ.

Энэ удаагийн гарц нь олон хоног үргэлжилдэг уламжлалт ангийн аялал болох микнаст бэлтгэх сургуулилт юм. Сургуулилтын үеэр нэг шонхорч шувуугаа зүүн гартаа барьж, нөгөө нь хубарагийн өдөөр хийсэн тилва хэмээх уруу татагч барин холдож зогсдог. Малгайг нь авч, хөлийг нь тайлсны дараа шонхор уруу татагч руу шумбаж, эцэст нь түүнийг барьдаг ажээ.

Тэрбээр ангийн аяллыг олз барихаас илүү холбоо харилцааны утгаар нь эрхэмлэдэг. «Ах дүү, гэр бүл, найз нөхдийн цугларалт л ангийн аяллын жинхэнэ утга учир юм» гэж тэрбээр хэлсэн байна.

Байгаль орчны агентлагийн амьтан хамгааллын мэргэжилтэн Омар Хумайд Аль Хамели Коранд 1400 жилийн өмнө шонхорын тухай дурдсан байдаг гэж онцолжээ. Эрт дээр үед бедуинчууд улирлын эхэнд шонхор барьж, номхруулан ан хийлгээд, улирлын төгсгөлд нүүдлээ үргэлжлүүлэхээр нь сулладаг байжээ. Одоо харин шонхорыг халуун улиралд агааржуулагчтай байранд байлгадаг гэнэ.

Ангийн зөвшөөрлийг Тамм аппликейшнаар олгодог бөгөөд эмиратчууд зөвхөн үржүүлгийн хубара агнах эрхтэй. Агентлаг өнгөрсөн жил 1525 зөвшөөрөл олгосон бол энэ улирал эхэлснээс хойш 823 зөвшөөрөл олгоод байна. Энэ жилийн тоо өнгөрсөн жилийнхээс давах төлөвтэй гэж Аль Хамели хэлжээ.

Байгаль хамгаалах олон улсын холбоо хубара тоодогийг эмзэг зүйлд ангилдаг ч хэт агнах аюул байхгүй гэж тэрбээр үзэж байна. Учир нь агнахыг зөвшөөрсөн шувууд үржүүлгийнх бөгөөд ан хийдэг бүх газарт агентлагийн эргүүл ажилладаг гэнэ.

Ремахын уугуул Саид Сухайл Аль Мухаррами шонхорчны гэр бүлд өсөж, 20 гаруй жилийн турш АНЭУ болон Мавритани зэрэг оронд ан хийжээ.

Шилдэг шувуу сая гаруй дирхамаар үнэлэгддэг ч шонхорын үнэ цэнэ нэр хүнд, мөнгөнөөс давдаг юм.