Сиднейд олон нийтийн эсэргүүцлийн дараа хиймэл оюуны дата төвийн төслийг цуцалжээ
Иргэдийн бүлэг энэ шийдвэрийг ард түмний хүчний ялалт гэж үнэлж байна.
Сиднейн өмнөд хэсгийн Арнклифф дахь Кукс голын эрэгт байгуулахаар төлөвлөж байсан маргаантай хиймэл оюуны дата төвийн төслийг цуцалсныг Эй Би Си телевиз мэдээлжээ.
Стокланд, Жон Бойд Пропертиз компаниуд Когара гольфын клубын 18.3 гектар талбайг ойролцоогоор гурван тэрбум таван зуун сая долларын логистикийн цогцолбор болгон дахин төлөвлөж, түүнд дата төв багтаахыг санал болгож байжээ.
Кукс голын хиймэл оюуны төслийг зогсоо нэртэй, хэдэн зуун гишүүнтэй бүлэг наймдугаар сараас хойш төслийг эсэргүүцэж ирсэн. Бүлгийн зохион байгуулагч Пэдди Гибсоны хэлснээр, төсөл аль хэдийн бохирдсон голын эмзэг экологид эрсдэл учруулах байсан.
«Олон хүн маш их бохирдсон голыг нөхөн сэргээх гэж ажиллаж байгаа бөгөөд энэ төсөл тэдний хүчин чармайлтыг ухраах вий гэж бид санаа зовж байсан» гэж Гибсон хэлжээ.
Тэрбээр мөн эрчим хүчний хэрэглээ, усны бохирдлын эрсдэлийн талаар санаа зовнилоо илэрхийлсэн байна.
Стокландын төлөөлөгчийн хэлснээр, түншүүд одоо дата төвгүй логистикийн цогцолбор барихад анхаарч байна. Төсөл Кукс голын дагуу нэг километр урт нийтийн эргийн зам, 14 гектар талбайтай Пемулвуй цэцэрлэгт хүрээлэнг бий болгох юм.
Энэ нь Сиднейд олон нийтийн эсэргүүцлийн улмаас цуцлагдсан дата төвүүдийн хамгийн сүүлийнх юм. Лэйн Ков, Гилдфорд дахь дата төвийн төслүүдийг ч өмнө нь цуцалжээ.
