Словакийн Гадаад хэргийн сайд Украины хэлэлцээрт ЕХ-ны төлөөлөгч томилохыг дэмжжээ

Словак улс Украины асуудлыг зохицуулах хэлэлцээрт оролцох Европын холбооны тусгай төлөөлөгч томилохыг дэмжиж байгаа гэж тус улсын Гадаад хэрэг, Европын асуудал эрхэлсэн сайд Юрай Бланар мэдэгджээ. Энэ тухай Интерфакс агентлаг «Известия» сонинд түшиглэн мэдээлэв.

«ЕХ-ны төлөөлөгч энхийн хэлэлцээрт оролцох асуудлыг хэлэлцэх нь бидний бодлоор бүрэн зүйтэй. Бид энэ санааг анхнаасаа бүрэн дэмжиж ирсэн» гэж Бланар хэлсэн байна.

Тэрбээр Украин дахь мөргөлдөөн эхэлсэн цагаас Словакийн одоогийн засгийн газар энэ мөргөлдөөнд цэргийн шийдэл байхгүй, бүх талын оролцоотой дипломат яриа хэлэлцээгүйгээр бат бөх энх тайван тогтоох боломжгүй гэсэн байр суурьтай байсныг сануулжээ.

Бланарын үзэж байгаагаар Европын холбоо өөрийн байр сууриа хадгалж, Европын аюулгүй байдлын бүтцийн талаарх үзэл баримтлал зэрэг ашиг сонирхлоо хамгаалахыг хүсвэл энхийн үйл явц, ОХУ-тай хийх яриа хэлэлцээнд илүү идэвхтэй үүрэг гүйцэтгэх ёстой аж.

«Хэлэлцээ хэдий чинээ хурдан эхэлнэ, хүмүүсийн цаашдын зовлон, сүйрлээс төдий чинээ хурдан урьдчилан сэргийлж чадна» гэж сайд үзэж байна.