Солонгосын дайны 20 мянга орчим ахмад дайчин л амьд үлдсэн тул засгийн газар тэдний дурсамжийг хадгалахаар ажиллаж байна

Арваннэгдүгээр сарын 5-нд Солонгосын дайны ахмад дайчид Пхёнтэк дэх Кэмп Хамфрис баазад зочилж, Америкийн шинэ үеийн цэргүүдтэй уулзсан нь тэднийг хүндэтгэх ховор агшин болжээ.

Гэвч 1950-53 оны дайнаас амьд үлдсэн 20 мянга орчим ахмад дайчин дунджаар 94 настай болжээ. Засгийн газар тэдэнд насных нь үлдсэн хугацаанд хангалттай асаргаа, эмнэлгийн болон санхүүгийн тусламж үзүүлж чадах эсэх нь илүү яаралтай асуудал хэвээр байна.

Тэднийг дагалдан явсан Эх оронч иргэд, ахмад дайчдын асуудал эрхэлсэн яамны дэд сайд Кан Юн Жин хэлэхдээ, засгийн газрын тэргүүн зорилт нь ахмад дайчдыг амьд сэрүүн байхад нь зохих асаргаа, хүндэтгэл үзүүлэх байх ёстой гэв.

“Хамгийн чухал нь ахмад дайчид эх орныхоо төлөө зүтгэсэнд нь зохих бахархал, нэр төртэйгээр насныхаа үлдсэн хугацааг эрүүл, тухтай өнгөрүүлэх явдал” гэж Кан Korea Times-д хэлжээ.

Засгийн газар дайны ахмад дайчдын сарын тэтгэмжийг 50 мянган воноор (38 ам.доллар) нэмж, энэ оны 490 мянган воноос 2027 онд 540 мянган вон болгохыг санал болгожээ. Батлагдвал энэ нь 2018 оноос хойших хамгийн том нэмэгдэл болно.

Гуравдугаар сараас эхлэн бага орлоготой ахмад дайчдын бэлэвсэн эхнэр, нөхөр ч санхүүгийн тусламж авах болсон байна.

Яам ахмад дайчдыг гэрийнхээ ойролцоо эмчлүүлэх боломжтой болгох үүднээс томилсон эмнэлгийн сүлжээгээ 2030 он гэхэд 1117-оос 2000 болгох зорилготой.

Засгийн газар ганцаараа амьдардаг ахмад дайчдад гэрийн асаргааны үйлчилгээ үзүүлж, хиймэл оюун ухаанд суурилсан хяналтын систем нэвтрүүлжээ. Уг систем утасны идэвхжил, хаалганы мэдрэгчээр гарч болзошгүй онцгой нөхцөл байдлыг илрүүлдэг.

“Улс орон маань хүнд байхад бид хамгаалсан. Одоо улсаасаа биднийг хамгаалахыг хүсч байна” гэж нэгэн ахмад дайчин Кантай ярилцахдаа хэлсэн байна.

Ахмад дайчдын тоо цөөрсөөр байгаа тул яам тэдний дайны тухай дурсамжийг хадгалахаар ажиллаж байна. Долдугаар сарын байдлаар НҮБ-ын командлалын дор тулалдсан орнуудын ахмад дайчдын дурсамжийн цахим архивт 514 ярилцлага хадгалагдаж байжээ.

“Өнөөдөр энд байгаа ахмад дайчид 70 гаруй жилийн өмнө өнөөгийн залуус шиг л залуу хүмүүс байсан” гэж дэд сайд Кан хэлэв.

Кэмп Хамфрист зочилсон ахмад дайчдын дунд Рю Жэ Сик, Кан Гу Гон нар байв. Рю Жэ Сик 18 настайдаа цэрэгт элсэж фронтод тулалдсан бол Кан Гу Гон 15 настайдаа сайн дураараа явж, Наймдугаар армийн хээрийн эмнэлэгт шархтай Америкийн цэргүүдийг асарч байжээ.