Сөүл хот гэрлэлтийг дэмжих зорилгоор 150 ганц бие хүнийг танилцуулна

Сөүл хот энэ оны сүүлчийн танилцах арга хэмжээгээ анх удаа 150 оролцогчтой болгон өргөжүүлж, 12 дугаар сарын 12-нд Дунгдэмүн Дизайн Плазад зохион байгуулахаа Лхагва гарагт мэдэгджээ. Энэ тухай Корея Таймс сонин мэдээлэв.

Энэ санаачилга хүмүүсийг үерхэж, гэрлэж, хүүхэдтэй болоход нь урамшуулж, хүн ам зүйн уналтыг эргүүлэх бодлогын нэг хэсэг юм. Хүүхэд төрүүлэх нь гэрлэлттэй нягт холбоотой Солонгост гэрлэлт цөөрч, хойшилж байгаа нь төрөлт буурахад нөлөөлжээ.

“Сөүл-тинг” нэртэй хөтөлбөр 2024 оны 11 дүгээр сард эхэлснээс хойш 17,700 орчим өргөдөл хүлээн авч, 179 хос бий болгожээ. Хот 2025 онд танилцах арга хэмжээгээ нэгээс дөрөв болгон нэмсэн юм.

Хот 75 эрэгтэй, 75 эмэгтэйг сугалаагаар сонгоно. Өргөдөл гаргагч нь Сөүлд оршин суудаг, урьд нь гэрлэж байгаагүй, ажил эрхэлдэг эсвэл чөлөөт ажилтан, 25-45 настай байх ёстой.

Өргөдлийг Пүрэв гарагаас 11 дүгээр сарын 30-ны өдрийн 1 цаг хүртэл хүлээн авч, үр дүнг 12 дугаар сарын 8-нд зарлах юм.

Зул сарын баярын өмнө болох арга хэмжээнд үзэсгэлэнгийн танхимаар аялах, сонирхлоор нь тохируулсан ганцаарчилсан болзоо, Дунгдэмүн орчмоор шөнийн алхалт багтана. Арга хэмжээг КБ Санхүүгийн группийн хандиваар санхүүжүүлж байгаа юм.

Энэ оны өмнөх хоёр арга хэмжээнд хүсэгчид маш олон байжээ. 9 дүгээр сард Ханган автобусанд болсон арга хэмжээний 100 суудалд 2,370 хүн өргөдөл гаргаж, 28 хос бий болсон бол 10 дугаар сард Санбон-дон дахь гадаа хоолны гудамжинд болсон арга хэмжээнд 1,448 хүн өргөдөл гаргаж, 25 хос үүссэн байна.

Нийт өргөдөл гаргагчдын 58.3 хувь нь эмэгтэйчүүд байсан нь аюулгүй, төрийн зохион байгуулалттай танилцах арга эмэгтэйчүүдэд хэрэгтэй байгааг харуулж байна гэж хот үзжээ. Хот арга хэмжээ бүрийн дараа оролцогчдыг групп чат, соёлын хөтөлбөрийн мэдээллээр дэмжсээр байх юм.