Суданы үйлдвэрүүд дайны их хохирлын дараа сэргэхэд бэрхшээлтэй байна
Ажлаа алдсан ажилчид, орон нутгийн бараа олдохгүй болсон худалдаачид ч хохирч байна.
Суданы арми болон Түргэн туслалцааны хүчний хоорондох дайнд сүйдсэн Хартумын үйлдвэрүүд дахин ажиллахад ихээхэн бэрхшээлтэй тулгарч байгааг Аль Жазира телевиз сурвалжилжээ.
Аж үйлдвэрийн яамны мэдээгээр дайны үеэр 1800 орчим үйлдвэрийн байгууламж эвдэрч, үүний 650 үйлдвэр бүрэн сүйрсэн байна.
Хартумд чихэр үйлдвэрлэдэг Мансур Гайлигийн үйлдвэр дахин ажиллаж эхэлсэн ч өмнөх хүчин чадлынхаа ердөө 40 хувьтай ажиллаж байна.
«Үйлдвэрүүдийг эвдэж, сүйтгэж, дээрэмдсэн нь системтэй байсан» гэж Хартумд хуванцар бүтээгдэхүүн үйлдвэрлэдэг Абдулела Мохамед хэлжээ.
Барилга, машин тоног төхөөрөмжөөс гадна түүхий эд, бэлэн бүтээгдэхүүн устаж, дээрэмдэгдсэн юм. Цахилгааны хомсдол, эвдэрсэн тээврийн сүлжээ, импортын өртгийн өсөлт үйлдвэрүүдийг дахин нээхэд саад болж байна.
Дайны өмнө 300 ажилчинтай байсан кунжутын тосны үйлдвэрийн гүйцэтгэх захирал Сара Эльфатих Халил салбарын үйлдвэрүүдийн 10 хүрэхгүй хувь нь л ажиллаж байгааг хэлсэн байна.
Аж үйлдвэрийн яам 8 дугаар сард Хартум мужийн үйлдвэрүүдийн байдлыг үнэлж, эзэд нь дахин нээхийг дэмжих урамшуулал боловсруулах хороо байгуулсан ч үйлдвэрийн эзэд дэд бүтэц сэргээхээс гадна хөрөнгө хэрэгтэй гэж үзэж байна.
Эдийн засагч Мохамед Эльнайер ирээдүйд нийслэлд дахин тулаан болвол салбар саатахаас сэргийлж, эдийн засгийн үр өгөөжийг тараахын тулд үйлдвэрлэлийг Суданы бусад мужид ч сэргээн байгуулах хэрэгтэй гэж үзжээ.
