Тайландын цагдаа нар хандивын санд ирсэн мөнгөний 65 хувийг хувийн хэрэгцээнд зарцуулсан гэж мэдэгджээ
Мисс Тайланд асан Панадда болон түүний нөхөр залилан, мөнгө угаах хэргээр шүүхэд анх удаа ирсэн юм.
Тайландын цагдаагийн Эдийн засгийн гэмт хэрэгтэй тэмцэх хэлтэс «Сайн үйлсийн сан»-д ирсэн хандивын ихэнхийг хувийн хэрэгцээнд зарцуулсан гэх мөрдөн байцаалтын анхны дүнг Бямба гарагт танилцуулсныг Бангкок Пост сонин мэдээлжээ.
50 настай Панадда, түүний 53 настай нөхөр Атип Анантаван нар Баасан гарагт залилан, мөнгө угаах зэрэг хэргээр баривчлах тушаал гарсны дараа эрх баригчдад өөрсдөө ирж бууж өгсөн. Хандивлагчид болон иргэд өнгөрсөн долоо хоногт хандив нь зориулалтын дагуу зарцуулагдаагүй гэж сэжиглэн гомдол гаргаснаар мөрдөн байцаалт эхэлжээ.
«Сэжигтэн олон нийтэд танигдсан нэр хүнд, нийгмийн ажилд оролцсоноо ашиглан Фэйсбүүк хуудсаар дамжуулан хандив цуглуулж байсан» гэж хэлтсийн дарга, цагдаагийн хошууч генерал Татпум Жарупрат хэлжээ.
Панадда 2015 оны 11 дүгээр сараас хувийн дансаараа хандив цуглуулж эхэлсэн. Тэрбээр 2017 онд сангийн Фэйсбүүк хуудсыг нээж, 2022 оны 3 дугаар сард санг Бангкокт бүртгүүлжээ. Мөрдөн байцаагчдын үзэж байгаагаар тэрбээр хандив хүлээн авдаг гурван дансыг бүгдийг нь хянаж байсан аж.
2015 оноос хойш гурван дансанд нэг сая гаруй хандивлагчаас 3,2 сая гаруй гүйлгээгээр 815 сая орчим бат орсны 527 сая орчим батыг хувийн ашиг сонирхолд зарцуулсан гэж цагдаа үзэж байна.
Сэжигтэй гүйлгээнд Атипт шилжүүлсэн 99 сая бат, Пхукет дахь усан сантай вилла барьсан гүйцэтгэгчид төлсөн 18 сая бат, сангийн хорооны гишүүдэд шилжүүлсэн 36 сая бат, хувьцаат санд оруулсан 24 сая бат, амьдралын даатгалд төлсөн 10 сая бат багтжээ. Хувьцаат сангаас татсан мөнгөөр 2,7 сая батын үнэт эдлэл, тансаг цүнх худалдаж авсан байна.
Сан хуулийн дагуу хорооны жилийн хурал хийж, бүртгэгчид жилийн тайлан ирүүлж байгаагүй бөгөөд үйл ажиллагааныхаа эхний хоёр жилд л татвар төлж байжээ.
