Танзани арав гаруй жилийн дараа анх удаа байгалийн хийн шинэ орд илрүүлэв

Танзани тус улсын өмнөд хэсэгт орших Мнази Бэй орчимд байгалийн хийн томоохон орд илрүүлснээ зарласан нь сүүлийн арван жилд анх удаа ийм нээлт хийсэн хэрэг юм. Энэ тухай Би Би Си мэдээлэв.

Эрчим хүчний сайд Жума Хомера төрийн өмчит Танзанийн газрын тосны хөгжлийн корпораци, Францын Морель энд Пром компанийн хамтран эзэмшдэг цооног дээр болсон ёслолд оролцжээ. Түүний хэлснээр, 223 тэрбум шоо фут буюу 6.3 тэрбум шоо метр гэж тооцогдож буй уг нээлт нь Зүүн Африкийн энэ орны газрын тос, байгалийн хийн жижиг салбарын хөгжилд «томоохон үе шат» болж байна.

Шинэ цооног ирэх сарын эхээр олборлолт эхэлж, дотоодын хангамжийг нэмэгдүүлэх юм. Танзани одоогоор 57.54 их наяд шоо фут байгалийн хийн нөөцтэй.

«Энэхүү нээлт нь ялангуяа аж үйлдвэрийн өсөлт болон бусад эдийн засгийн үйл ажиллагаанаас болж эрэлт нэмэгдэж буй энэ үед улс орноо найдвартай, цэвэр, аюулгүй эрчим хүчээр боломжийн үнээр хангахад чухал» гэж Хомера хэлэв.

Засгийн газрын 2024 оны статистикаар, байгалийн хий Танзанийн цахилгаан үйлдвэрлэлийн эх үүсвэрийн бараг 80 хувийг эзэлж байжээ. Сүүлийн жилүүдэд тус улс автомашинд шахсан байгалийн хий ашиглахыг дэмжиж, голчлон хамгийн том хот Дар-эс-Саламд байгалийн хийн үйлдвэр, түгээх станцууд байгуулжээ.

Танзани анхны байгалийн хийн ордоо 1974 онд Сонго Сонго арал дээр, хоёр дахь ордоо 1982 онд Мнази Бэйд илрүүлсэн. Эдгээр ордыг 2004 оноос арилжааны зорилгоор ашиглаж эхэлсэн бөгөөд 2016 онд 2.7 их наяд шоо фут байгалийн хийн хамгийн том ганц нээлт хийгдсэн юм.