Токаев Казахстаны илгээлтдээ 14 тэрбум ам.долларын бүтээн байгуулалтын төлөвлөгөө танилцуулав
Ерөнхийлөгч 2027 оныг бүтээн байгуулалтын жил болгон зарлаж, хөдөлмөрийн хөлсний доод хэмжээг нэмэгдүүлэхийг даалгав.
Казахстан 2029 он гэхэд Үндэсний сангаас 6.5 их наяд тэнгэ буюу 14.3 тэрбум орчим ам.долларыг дэд бүтцийн төсөлд зарцуулж, мөн хугацаанд цахилгааны дутагдлаа арилгахаар төлөвлөж байгааг Ерөнхийлөгч Касым-Жомарт Токаев 10 дугаар сарын 28-нд ард түмэндээ хандсан жил бүрийн илгээлтдээ зарлажээ. Энэ тухай Таймс оф Сентрал Эйша хэвлэл мэдээлэв.
Токаев 2027 оныг бүтээн байгуулалтын жил болгон зарлаж, зам, нисэх буудал, төмөр замын буудал, олон нийтийн байгууламжийг хамарсан улсын хөтөлбөр хэрэгжүүлэхийг санал болгов. Засгийн газар 2029 оны эцэс гэхэд Үндэсний сангаас 6.5 их наяд орчим тэнгэ хуваарилах бөгөөд үүнээс 1.5 их наяд тэнгэ буюу 3.3 тэрбум ам.долларыг 2026 оны үлдсэн сарууд болон 2027 оны эхний хоёр сард нийгмийн төсөлд зарцуулна.
Хөтөлбөрөөр 70 орчим эрүүл мэндийн байгууламж, 50 орчим боловсрол, спорт, соёлын байгууламж барих юм.
Токаевын хэлснээр, төрийн санхүүжилт хөтөлбөрийг бүхэлд нь санхүүжүүлэх бус хувийн хөрөнгө оруулалт татахад туслах ёстой.
Улсын эрчим хүчний сүлжээний операторын мэдээллээр, Казахстан 2025 онд 123.1 тэрбум киловатт цаг цахилгаан үйлдвэрлэж, 124.6 тэрбумыг хэрэглэсэн бөгөөд 1.5 тэрбум орчим киловатт цагийн дутагдлыг импортоор нөхжээ. Ерөнхийлөгч 2029 он гэхэд цахилгааны үйлдвэрлэл дотоодын хэрэглээнээс тогтвортой давах зорилт тавьсан ч Балхашийн атомын станцын анхны реактор 2034 он хүртэл ажиллаж эхлэхгүй юм.
Токаев мөн Хятад, Европын хоорондох ачаа тээвэрт Казахстаны үүргийг өргөжүүлэх төлөвлөгөөг танилцуулсан.
Зүүн Казахстан дахь 272 километр урт Бахты-Аягөз төмөр зам 2027 онд нээгдэж, хоёр орны хоорондох төмөр замын жилийн ачаа тээврийн хүчин чадлыг 28 сая орчим тонноос 48 сая тонн болгон нэмэгдүүлэх төлөвтэй.
Ерөнхийлөгч мөн 2027 оны 1 дүгээр сарын 1-нээс сарын хөдөлмөрийн хөлсний доод хэмжээг 85 мянган тэнгэгээс 110 мянган тэнгэ болгон нэмэгдүүлэхийг даалгав. Токаевын хэлснээр, энэ арга хэмжээ 1.8 сая орчим хүний орлогыг нэмэгдүүлэх юм.
