Төрийн Дум 2027-2029 оны холбооны төсвийн төслийг эхний хэлэлцүүлгээр хэлэлцэнэ

ОХУ-ын Төрийн Дум пүрэв гарагийн хуралдаанаараа 2027 оны болон 2028-2029 оны төлөвлөлтийн үеийн холбооны төсвийн тухай хуулийн төслийг эхний хэлэлцүүлгээр хэлэлцэхээр төлөвлөжээ. Энэ тухай Интерфакс агентлаг мэдээлэв.

Засгийн газар хуулийн төслийг есдүгээр сарын 30-нд өргөн барьсан бөгөөд Шадар сайд, Сангийн сайд Антон Силуанов илтгэл тавих юм.

Холбооны төсвийн орлогыг 2027 онд 43.3 их наяд рубль, 2028 онд 45.83 их наяд, 2029 онд 48.62 их наяд рубль байхаар төсөөлжээ. Зарлагыг харгалзан 48.74 их наяд, 50.95 их наяд, 53.87 их наяд рубль байхаар төлөвлөсөн байна.

Төсвийн алдагдал 2027 онд 5.44 их наяд рубль буюу дотоодын нийт бүтээгдэхүүний 2.2 хувь, 2028 онд 1.9 хувь, 2029 онд мөн 1.9 хувьтай тэнцэнэ. Төсвийн дүрмийн дагуу 2027-2030 онд газрын тосны суурь үнийг баррель тутамд 50 ам.доллараар тооцох юм.

Думын төсөв, татварын хороо дүгнэлтдээ улсын өрийн дотоодын нийт бүтээгдэхүүнд эзлэх хувь 2026 оны эцэст 19.9 хувь байснаас 2029 оны эцэст 24.1 хувь болж өсөхийг онцолжээ. Өрийн үйлчилгээний зардал нийт зарлагад эзлэх хувь 2027 онд 9.4 хувиас 2029 онд 10.5 хувь болох аж.

«Улсын өрийн үйлчилгээний зардлын өсөлтийн хурд нийт зардлын өсөлтөөс бараг 2.5 дахин давж байгаа нөхцөлд төсвийн тогтолцооны санхүүгийн тогтвортой байдлыг хангахад тэнцвэртэй өрийн бодлого чухал болж байна» гэж хорооны дүгнэлтэд бичжээ.

Хорооны үзэж байгаагаар газрын тос, байгалийн хийн орлогыг болгоомжтой тооцсон ч дэлхийн эдийн засгийн тодорхойгүй байдлаас болж бүрэн төвлөрүүлж чадахгүй эрсдэл хэвээр байна. Мөн бүс нутгуудад төсөв хоорондын шилжүүлэг хугацаандаа хуваарилагдаагүй нь төлөвлөлтөд сөргөөр нөлөөлсөн гэж хороо үзжээ.

Төслөөр бүс нутгуудад 2027 онд 3.61 их наяд рублийн төсөв хоорондын шилжүүлэг олгоно. Үүнээс хүнд байдалд орсон бүс нутгуудад 100 тэрбум рубль хуваарилахаар төлөвлөжээ.