Украины асуудлаарх хэлэлцээнд Европыг Европын холбоо болон таван улсын үндэсний аюулгүй байдлын зөвлөхүүд төлөөлнө
Европыг дээд түвшинд төлөөлөх хүнээ Европын удирдагчид хараахан тодорхойлоогүй байна.
Медуза1 мин унших
МедузаОрос, Украины дайныг зогсоох ирээдүйн хэлэлцээнд Европын холбоо, Герман, Франц, Их Британи, Итали, Польшийн үндэсний аюулгүй байдлын зөвлөхүүд Европыг төлөөлнө гэж Bloomberg мэдээлжээ.
Европын удирдагчид арваннэгдүгээр сарын 12, 13-нд Дублинд болсон дээд хэмжээний уулзалтаараа ийм шийдвэр гаргасан байна.
Европын төлөөлөгчдийн бүрэлдэхүүнийг Европын зөвлөлийн дарга Антониу Кошта, Польшийн Ерөнхий сайд Дональд Туск нар баталжээ.
“Энэ хэлэлцээнд бидний зарчим, байр суурь сайн мэдэгдэж байгаа. Манай Европын баг Европын холбооны бүх гишүүнтэй бүрэн эв нэгдэлтэй, нягт уялдаатай ажилласаар байх болно” гэж Кошта X сүлжээнд бичэв.
Зөвлөхүүд ирэх хэлэлцээнд техникийн түвшинд оролцоно гэж Европын нэгэн өндөр албан тушаалтан Bloomberg-д хэлсэн байна. Харин дээд түвшний хэлэлцээнд оролцох төлөөлөгчөө Европ одоогоор томилоогүй байна.
Украины Ерөнхийлөгч Володимир Зеленский АНУ-ын зуучлалаар явагдаж буй Орос, Украины хэлэлцээнд оролцох төлөөлөгч томилохыг Европын удирдагчдыг өмнө нь уриалж байсан юм.
АНУ-ын Ерөнхийлөгчийн тусгай элч Стив Уиткофф Оросын Ерөнхийлөгч Владимир Путинтэй хэлэлцээ хийсний дараа гурван талт хэлэлцээг өргөжүүлж, Европыг оролцуулна гэж мэдэгдсэн юм.
Москва европчуудыг оролцуулахыг эсэргүүцэхгүй гэж Кремлийн хэвлэлийн төлөөлөгч Дмитрий Песков хэлсэн. Гэвч Путин америкчуудтай уулзахдаа энэ сэдвийг огт хэлэлцээгүй гэж Оросын Гадаад хэргийн яам мэдэгджээ. Кремль европчуудын жинхэнэ санаа зорилго, энхийн үйл явцад хувь нэмэр оруулах бэлэн байдлыг ойлгосны дараа л өргөтгөсөн хэлбэрийн яриа хэлэлцээний талаар бодит шийдвэр гаргана гэж Песков хэлсэн байна.
