Узбекистан 2027 онд эдийн засгаа 7 хувиар өсгөж, инфляцыг 6 хувь хүртэл бууруулахаар төлөвлөж байна

Узбекистаны Ерөнхийлөгч Шавкат Мирзиёев арваннэгдүгээр сарын 13-нд 2027 оны улсын төсвийн төслийн үндсэн үзүүлэлт, макро эдийн засгийн таамаглалтай танилцсаныг түүний хэвлэлийн алба мэдээлэв.

Тооцоогоор 2027 онд дотоодын нийт бүтээгдэхүүн 232 тэрбум ам.долларт хүрэх бөгөөд төсвийн төслийг 7 хувийн эдийн засгийн өсөлтөд тулгуурлан боловсруулж байна.

Инфляцыг 2027 онд 6 хувь, 2028-2029 онд 5 хувь хүртэл бууруулж, алтнаас бусад экспортыг 2027 онд бараг 40 тэрбум ам.долларт хүргэхээр төлөвлөжээ. 2026 оны инфляцын таамаглал 7 хувь байгаа юм.

Ирэх оны улсын төсвийн орлогыг 416 их наяд, зарлагыг 464 их наяд сумаар тогтоохоор төлөвлөж байна.

“Ирэх оны хамгийн чухал зорилтуудын тоонд инфляцыг 6 хувиас хэтрүүлэхгүй байлгах, нийт төсвийн алдагдлыг дотоодын нийт бүтээгдэхүүний 3 хувиас хэтрүүлэхгүй байх асуудал багтжээ” гэж мэдэгдэлд онцолжээ.

2027 онд татварын үндсэн хувь хэмжээг өөрчлөхгүй байхаар тусгасан байна. Төсвийн орлогыг эдийн засгийн идэвхийг дэмжих, татварын баазыг өргөжүүлэх, сүүдрийн эдийн засгийг багасгах замаар нэмэгдүүлэх ёстойг хуралдаанд онцлов.

Ерөнхийлөгч хөрөнгө оруулалтын хөтөлбөрийн дагуух барилгын ажилд төсвийн хөрөнгө хэрхэн зарцуулагдаж буйг хянах системийг туршилтаар нэвтрүүлэхийг үүрэг болгожээ.

Ирэх онд боловсролд 114.3 их наяд сум буюу 2026 оныхоос 14 их наяд сумаар, эрүүл мэндэд 61.4 их наяд сум буюу 12 их наяд сумаар илүү хөрөнгө зарцуулахаар санал болгожээ.

Мөн бүс нутаг, махаллагийн дэд бүтэц, хөдөлмөр эрхлэлт, хүн амын орлого, нийгмийн хамгааллыг сайжруулахад 70 их наяд сум зарцуулахаар төлөвлөжээ.

2026 онд эдийн засаг дор хаяж 8 хувиар өсөж, дотоодын нийт бүтээгдэхүүн 200 тэрбум ам.доллараас, нэг хүнд ногдох орлого 5200 ам.доллараас давах төлөвтэй байна.

Төсвийн төслийг орон нутгийн кенгашуудаар хэлэлцүүлсний дараа Олий Мажлисын Хууль тогтоох танхимд өргөн барина.