Узбекистан 2030 он гэхэд уран үйлдвэрлэлээ хоёр дахин нэмэгдүүлэхээр төлөвлөж байна

Узбекистан уран үйлдвэрлэлээ 2026 оны 7.5 мянган тонноос 2030 онд 15 мянган тоннд хүргэхээр төлөвлөж байна гэж Газета.уз сайт мэдээлэв.

Төлөвлөгөөг 11 дүгээр сарын 5-нд Ерөнхийлөгч Шавкат Мирзиёевт Навоийуран, Узбекистаны технологийн металлын комбинат компанийн төслийн танилцуулгын үеэр танилцуулжээ. Баталгаат нөөцийг 200 мянган тоннд хүргэх зорилт тавьсан байна.

Комбинат одоо вольфрам, молибден, селен, теллур, рени гэсэн таван металлын бүтээгдэхүүн гаргаж байгаа аж. Ерөнхийлөгч никель, кобальт, графит, зэс зэрэг 11 төрлийн бүтээгдэхүүн нэмж эзэмшихийг даалгасан бөгөөд 2030 он гэхэд 16 төрлийн түүхий эдийн үйлдвэрлэлийн үнэ цэнэ 2.7 тэрбум доллараас давах ёстой.

Дэлхийд чухал ашигт малтмалын эрэлт жилд ойролцоогоор 10 хувиар өсөж байхад уламжлалт металлынх дунджаар 1 хувиар өсдөг гэж уулзалтад дурджээ.

Вольфрамын боловсруулалтын төслүүдэд 1.1 тэрбум долларын хөрөнгө оруулалт татаж, 2030 он гэхэд бүтээгдэхүүний үнэ цэнийг бараг 2.2 тэрбум доллар болгохоор зорьж байна.

Ураны дэлхийн эрэлт 2030 он гэхэд дахин 28 хувиар өсч магадгүй гэсэн тооцоог ерөнхийлөгчид танилцуулсан аж. Узбекистан 2026-2030 онд нийт 4.2 тэрбум долларын өртөгтэй 120 төсөл хэрэгжүүлэхээр 6 дугаар сард төлөвлөж байсан юм.