Узбекистанд эрлийз болон цахилгаан автомашин угсрах үйлдвэр байгуулна
Жиззах дахь автомашины үйлдвэрт хийх хөрөнгө оруулалт 100 сая ам.долларт хүрэх юм.
Узбекистаны Эй Ди Эм Глобал группийн Жиззах дахь автомашины үйлдвэр Өмнөд Солонгосын нэгэн компанитай эрлийз болон цахилгаан автомашиныг хэсэгчлэн угсрах үйлдвэрлэлийн тоног төхөөрөмж суурилуулах гэрээ байгуулжээ. Энэ тухай «Газета» сайт компанийн хэвлэлийн албыг иш татан мэдээлэв.
Угсрах цех барихад 100 сая хүртэл ам.долларын хөрөнгө оруулалт хийх аж. Үйлдвэрийн нутаг дэвсгэрт шинэ цогцолборын барилга эхэлсэн бөгөөд энд Хятадын Чанъань, Чери, Хавал брендийн эрлийз болон цахилгаан автомашин үйлдвэрлэхээр төлөвлөжээ.
Энэ технологиор их биеийг гагнах, будахаас эхлээд эцсийн угсралт, бэлэн автомашины чанарын хяналт хүртэлх бүрэн мөчлөгийг хамарна. Одоогоор тус үйлдвэрт ийм технологиор дотоод шаталтат хөдөлгүүртэй Киа автомашин үйлдвэрлэж байна.
Шинэ цогцолборын онцлог нь өөр өөр брендийн автомашиныг нэг үйлдвэрлэлийн шугамд гаргах боломжтой байх юм. Бүтээгдэхүүнийг Узбекистаны дотоод зах зээл болон экспортод чиглүүлнэ гэж компани мэдэгджээ.
Эй Ди Эм Глобал групп 2014 онд байгуулагдсан бөгөөд суудлын болон арилжааны автомашины түгээлт, дотоодын үйлдвэрлэл, борлуулалт, засвар үйлчилгээ эрхэлдэг.
Тус групп Узбекистан даяар 115 гаруй дилерийн төвтэй.
