Суданы Дарфурын зах руу хийсэн цохилтод 100 гаруй хүн амь үрэгджээ
Хүний эрхийн бүлгийн мэдээлснээр амь үрэгдэгсдийн ихэнх нь эмэгтэйчүүд, хүүхдүүд байжээ.
Суданы баруун өмнөд хэсгийн Дарфурт энэ долоо хоногийн эхээр цэргийнхний нисгэгчгүй онгоцоор хийсэн цохилт хагас цэрэгжсэн бүлэглэлийн дайчдын олноор очдог хотын хөл хөдөлгөөн ихтэй захыг онилсон бөгөөд 100 гаруй хүн амь үрэгджээ. Энэ тухай Аль Жазира гэрчүүдийг иш татан мэдээлэв.
Хүчирхийллийг бүртгэдэг «Яаралтай тусламжийн өмгөөлөгчид» хүний эрхийн бүлгийн мэдээлснээр даваа гарагийн халдлагад 100 гаруй хүн амь үрэгдэж, 113 хүн шархаджээ. Халдлага Түргэн дэмжлэгийн хүчний бодит нийслэл болсон Өмнөд Дарфурын Ньяла хотод болсон бөгөөд гэрчүүдийн хэлснээр дайчдад бараа зардаг олон энгийн худалдаачин амь үрэгдсэн байна.
Ассошиэйтед Пресс агентлагт ярьсан нэгэн гэрчийн тооцоолсноор цай, хоол зардаг эмэгтэйчүүд голлосон 14 орчим энгийн иргэн амь үрэгджээ. Армийн талд тулалдаж буй Тусгай ажиллагааны хүчний хэвлэлийн төлөөлөгч Мохамед Дидан харин Ньялагаас баруун тийш орших хуаранд «150 гаруй цэрэгт элсэгч» алагдсан гэж Фэйсбүүкт бичжээ.
Хохирогчдын тоог бие даан баталгаажуулах боломжгүй байна. Суданы эмч нарын сүлжээ урьдчилсан байдлаар 21 хүн амь үрэгдэж, 40 гаруй хүн шархадсан гэж мэдээлжээ.
Хил хязгааргүй эмч нар байгууллагын мэдээлснээр захын халдлагын дараа хоёр дахь цохилт энгийн иргэдийн хороолол руу оножээ. Тус байгууллагын дэмждэг Ньялагийн эмнэлэгт цохилтын дараах хэдэн цагт 36 цогцос ирсний 21 нь энгийн хувцастай байсан бөгөөд яаралтай тусламжийн тасагт 150 гаруй шархадсан хүн хүлээн авчээ.
«Зах, орон сууц, иргэний чухал дэд бүтэц бай биш. Мөргөлдөөнд оролцогч бүх тал энгийн иргэдийг хамгаалах ёстой» гэж байгууллага мэдэгдэлдээ дурджээ.
НҮБ-ын мэдээлснээр Суданд нисгэгчгүй онгоцны цохилт энгийн иргэдийн амь насыг хохироох гол шалтгаан болжээ. Түргэн дэмжлэгийн хүчний хяналтад буй Ньялад хүнд хэлбэрийн цочмог хоол тэжээлийн дутагдлаар эмчлүүлэх хүүхдийн хувь нэгдүгээр сараас наймдугаар сарын хооронд 5 хувиас 11 хувь болж хоёр дахин өссөн байна. Дөрөв дэх жилдээ үргэлжилж буй дайн дэлхийн хамгийн хүнд дүрвэлтийн хямралыг үүсгээд байгаа юм.
